UMSAKAZI woKhozi FM, uBingelela "Bings" Mpanza, usephinde wanyelwa yinyoni esandleni njengoba engomunye wamaciko amele iNingizimu Afrika kuma-Abroad Achievement Awards eBridgetport, e-USA ngo-Okthoba 5, kulo nyaka.
Kulo mqhudelwano wezindondo kubungazwa, ikakhulukazi abantu abadabuka e-Afrika kodwa asebevelele nasemazweni angaphandle.
UBingelela (34), osakaza noTshatha Ngobe uSigiya Ngengoma, uqokwe emunxeni weRadio Personality/DJ lapho eqhathwe khona noKuli Nhlapho, Sbo Mdunge, Nombuso Mahlangu, Lasizwe Da Fox, SpheLive noQuebec Mlamuli Miya.
Lo msakazi uthe ujabule kakhulu ngale mpumelelo ngoba kuye isho ukuthi uyakhula kakhulu.
"Ngingumuntu wesifazane osebenza kanzima, ngisebenza ngokuzikhandla. Ngiyabonga nje uma imiphumela yokuzikhandla kwami ibonakala."
UBingelela ubuye wancoma kakhulu indlela izinto ezenzeka ngayo empilweni yakhe, wathi yingoba uyalisebenzisa ithuba uma elinikiwe.
"Ngibonga bonke abantu ababe nami kusukela ngiqala ukuzakhela igama likaBingelela. Bonke abakholelwa kimi. Ngicela abantu bangivotele ngokuthumela iSMS ebhalwe ukuthi Bingelela Mpanza ku-41539 ukuze ngibuye nale ndondo. Ukuphumelela kwami ukuphumelela kwendlu emnyama."
UBingelela ukhethwe kulo mncintiswano noDJ Mngadi, TDK Maccassette, Mahalia Buchanan wodumo kwiJoyous Celebration, DJ Mpiloz noDJ Cndo.
Kwenzeka lokhu nje, uBingelela usanda kuthola ingqayizivele yethuba lokuyonandisa edolobheni lase-Austria, iVienna ngo-Agasti kulo nyaka.
Le ntokazi edabuka esigodini saKwaGugothandayo, eMatheni, kwaNongoma izofulathela elakuleli ngo-Agasti 15, ize ibuyele eNingizimu Afrika ngomhla ka-26.
Ithe izonandisa emcimbini ngomhla ka-21 nangomhla ka-24.
UBingelela ubonge kakhulu uMdali ngale ngqayizivele yethuba alitholile njengoba ezobe eqala ukuwelela phesheya kwezilwandle, wathi lokhu kusho ukuthi umculo wakhe sewuthakaselwa naphesheya kwezilwandle.
Kwenzeka lokhu nje ukhiphe icwecwe eliyi-EP elisihloko sithi Ibuya Nyakenye eliqukethe amanoni athi Soka Lami nelithi Baba Wami.
Njengoba esekhiphe icwecwe likamaskandi, uBingelela wakhipha i-albhamu yokuqala ye-Afro soul/jazz esihloko sithi Isibingelelo ngo-2015.
Uthe wayevele ezifela ngomculo kamaskandi njengomuntu odabuka emakhaya kodwa ugqugquzeleke kakhulu esesakaza uhlelo lomculo kamaskandi.
