UMASIPALA waseNdumeni usolwa ngokushalazela umbiko ophakamisa ukuthi kuthathelwe izinyathelo zokuqondisa ubugwegwe izikhulu zomkhandlu ezithinteka enkohlakalweni.
USomlomo womkhandlu, uMnuz Andile Nsibande, usolwa ngokuhudula izinyawo ekubizeni umhlangano womkhandlu ozobhunga ngalo mbiko.
Lo mbiko owenziwa uMnyango wezokuBusa ngokuBambisana neziNdaba zoMdabu KwaZulu-Natal, uphakamisa ukuthi kuthathelwe izinyathelo izikhulu zomkhandlu ezimbili ezithinteka enkohlalweni yezigidi zamaRandi.
Lo mbiko obonwe yiSolezwe, wathola ukuthi lezikhulu ezimbili zikhokhela izigidi zamaRandi inkampani yonogada eyayingenaso isivumelwano sokusebenzisa nomasipala ngaleso sikhathi.
Uphinde uphakamise ukuthi kuphenywe ubudlelwano bezikhulu ezithintekayo kanye nabanikazi benkampani yonogada.
Esinye isikhulu esithintekayo kule nkohlakalo sesathola isikhundla esiphezulu kulo mkhandlu.
Lo mbiko wethulelwa umhlangano womkhandlu owawungasekuqaleni kuka-Ephreli.
Umasipala wanikezwa izinsuku ezingu-21 ukuba uhlalise umhlangano owawuzothatha isinqumo ngalolu daba.
Kuze kube manje umhlangano awukaze ubizwe.
Ukungabizwa komhlangano sekususe imvunge njengoba kukhona amalungu omphakathi ahlela ukuba nombhikisho ngalolu daba kanye nezinye izikhalazo ezithinta ukuphathwa komkhandlu.
Usotswebhu we-ANC kulo mkhandlu, uMnuz Siphamandla Kheswa, uthe abakaze batshelwe ukuthi kungani ungakaze ubizwe umhlangano ozoxoxa ngalo mbiko.
Uthe sebebhalele uMphathiswa wezokuBusa ngokuBambisana neziNdaba zoMdabu KwaZulu-Natal, uMfu Thulasizwe Buthelezi, uNgqongqoshe woMnyango kuzwelonke, uMnuz Velenkosini Hlabisa kanye nehhovisi likaMengameli bekhalaza ngalolu daba.
"UButhelezi wagcina ngokuqinisekisa ukuthi uyitholile incwadi yethu kodwa akazange asiphendule. UHlabisa naye akakaze asiphendule. Sesizame ngazo zonke izindlela ukuthola izimpendulo kodwa lutho."
UKheswa uthe bayaweseka umbhikisho ohlelwa umphakathi.
"Ngoba thina njengamakhansela bayasibalekela, mhlawumbe kungcono khona ukuthi babhekane nolaka lomphakathi. Abantu banelungelo lokubhikisha. Abaphethe umkhandlu kuzofanele bezochazela abantu ukuthi kungani umbiko ufihliwe. Ngingasho nje ukuthi sizobe sikhona nathi kulowo mbhikisho womphakathi ngoba iyasithinta le ndaba."
Okhulumela uMnyango wezokuBusa ngokuBambisana neziNdaba zoMdabu, uMnuz Senzelwe Mzila, uthe uNsibande wacelwa ukwelulelwa isikhathi.
"Nempela umnyango wabe usumlulela isikhathi sokuba abize umhlangano womkhandlu."
UKheswa ubuze ukuthi uNsibande wayethunywe ubani ukuba ayocela ukululelwa isikhathi.
"Leso kwakungafanele kube isinqumo sakhe yedwa, kwakufanele abize umhlangano, bese amakhansela evumelana ngokuthi acele ukululelwa isikhathi."
Imizamo yokuthola ukuphawula kukaNsibande ayizange iphumelele njengoba ucingo lwakhe belungangeni, futhi akazange awuphendule umbuzo awuthunyelwe.