ZISHAYANE ngengoma zaze zabukana izinkakha zomculo kamaskandi emcimbini obuseFarmers Hall Ground, eNewcastle, ngoMgqibelo ebusuku.
Kulo mcimbi obizwa ngeNdumezulu KaMaskandi Festival bekuboshelwe abaculi okubalwa kubo uGatsheni, Mthandeni, Khuzani, Thokozani Langa, Ntencane, Limit Nala nabaculi bendawo.
Umphakathi ubuphume ngobuningi inkundla igcwele phama. Ubuholi bukamasipala buthembise ukuthi bazoweseka uma usubuya isibili ngonyaka ozayo umcimbi njengoba ukhombise isasasa yize ubuqala ukuba khona.
UGatsheni obebhekwe ngabomvu ngenxa yokuba nengoma eshisa izikhotha iHit After Hit ulindise abantu waze wangena ezintathakusa abantu bethi abayi ndawo engakafiki.
Umhleli walo mcimbi, u-Algene Timm, ubonge kakhulu umphakathi obuphume ngobuningi.
"Kusethusile ngoba bekuqala ukuba nomcimbi kamaskandi eNewcastle. Indumezulu Events isazohambela ebantwini ivumbulula ithalente. Inhloso ukukhulisa ezomculo eNewcastle," kusho uTimm.