KUZOKHONJISWA imidlalo ehlukene yeshashalazi, okuzoxutshwa nobuciko bomculo ukusiza ukugqamisa ezeshashalazi emcimbini wobuciko iHilton Arts Festival, oqala namhlanje uze uphethwe ngeSonto eHilton College, eMgungundlovu.
Umqondisi wezobuciko kulo mcimbi osubuya ihlandla lika-32 nonyaka, uSue Clarence, uthe nonyaka kuzoba nendathane yemicimbi yobuciko bomculo, amahlaya nemibukiso yemidwebo yobuciko engaphezu kuka-100 ezobe ikhangiswa kuwona.
“Inhloso yethu wukubuyisa idumela lemidlalo yeshashalazi ngalo mcimbi ozothatha impelasonto yonke emagumbini awu-15 esizowasebenzisa ukusingatha izigcawu zawo ezehlukene,” kusho uSue.
Emidlalweni yeshashalazi ezokhonjiswa kubalwa iBorn Naked, My Fellow South African, umdlalo osuwole izindondo obhalwe wuMike van Graan othi My Name is Lucy Barton ozobe ukhonjiswa okokuqala kuleli nothi The Return of Elvis Du Pisanie kaPaul Slabolepzy.
Kuwona futhi umcimbi kuzonandisa iKZN Philharmonic Orchestra, Andrew Lloyd Webber, Tonya Koenderman, Adrian no-Emma-Jean Galliard.
Amathikithi okwethamela umcimbi izinsuku zontathu abiza uR100 umuntu emunye eWebtickets.
