ABABUKELI basazobhema bakholwe emdlalweni omusha okhonjiswa kwiSABC1 ngeSonto ngo-7.30 ebusuku, osihloko sithi Family Secrets. Lesi sithembiso senziwe yisikhulu sakwaSABC1, uPumzile Zonke. Uthe okumenza abe neqholo, ubumnandi oqukethwe eziqeshini eziningi.
I-Family Secrets, eqale ukukhonjiswa izolo, ibophele abalingisi abaningi ababuya nakwiGenerations okunguSonia Mbele owayenguNtombi Khumalo kodwa kulo mdlalo onguCleopatra Mokoena, Sophie Ndaba owayenguQueen Moroka kulo mdlalo onguShanice Moore, Menzi Ngubane owayenguSbusiso Dhlomo onguNapoleon Biko, Katlego Danke owayenguDineo Mashaba. Omunye othathwe kwiGenerations The Legacy nguVusi Kunene onguJack Mabaso kodwa kulo mdlalo, unguHannibal Razor.
Ngokwesitatimende esithunyelelwe abezindaba, iFamily Secrets igxile ezigamekweni zomndeni ezidalwa yisiqumama esinamandla uCaesar Mokoena (okuyindawo eqavile elingiswa nguMangaliso Ngema, osanda kuxoshwa kwiLithapo). Abanye abalingisa kulo mdlalo ngoThembi Seete ongu-Elanor Grace, Michelle Botes onguDawn Pretorius noRobert Whitehead onguHarold Stone.
Abadidiyeli abakhulu balo mdlalo nguPulane Shomong noBongani Sibeko abaqinisekise ukuthi kuzobonakala nabalingisi abasha.