IMPUMELELO yabo kwezomculo yenze ukuthi amaciko ama-piano okungumculi u-Azana, nophrojusa uSam Deep bakhipha i-albhamu ethi Kwakhanya.
Bathi inhloso yokukhipha i-albhamu wukukhuthaza abantu ukuthi bangadikibali kwabakwenzayo ukuze baphumelele.
I-albhamu iqale ukutholakala ezitolo zomculo ngeledlule.
Exoxa neSolezwe, uSam Deep waseMnambithi, uthe waxhumana no-Azana waseThekwini, wamcela ukuthi bahlanganise i- albhamu egabe ngezingoma eziyisithupha ezikhuthazayo.
“Esesikwenzile emculweni wethu kuthela izithelo ezinhle manje, yingakho senze i-albhamu ukukhuthaza abantu ukuthi bakholelwe kwabakwenzayo. Babe nethemba lokuthi izinto zizolunga - njengoba nathi sike saba sesigabeni lapho izinto bezibheda khona andukuba kulunge manje,” kusho uSam Deep.
Uthe kubathathe izinyanga ezimbili ukuhlanganisa i-albhamu, waqinisekisa ukuthi bazoqhubeka bakhiphe umculo omusha nomnandi ukujabulisa abalandeli babo.
USam Deep, ogama lakhe lokuzalwa nguSamukelo Mavuso, uzakhele igama emculweni ngengoma ethi Impumelelo, ayishaya no-Eemoh nethi Isgubhu apike u-Aymos noNjelic kuyona.
U-Azana ogama lakhe lokuzalwa nguMakhosazana Masango, ugqame emculweni ngengoma yakhe ethi, Your Love.