UZOGABA nangobumnandi bamaciko ahlukene umcimbi we-Economic Freedom Fighters (EFF) kusasa emini eMoses Mabhida Stadium eThekwini.
I-EFF yize iyiqembu lezepolitiki kodwa inenqwaba yosaziwayo abaphumela obala ngokuhambisana nayo. Abanye osaziwayo bazoba yingxenye yendumezulu womcimbi wekwethula umhlahlandlela wokhetho ebantwini bakuleli.
Phakathi kosaziwayo abalindelekile kubalwa uLinda ‘Mr Magic’ Sibiya, owaduma ngesikhathi esengumsakazi woKhozi FM. Kuzokhumbuleka ukuthi uMr Magic usanda kukhalima omunye wozakwabo ayesebenza naye emsakazweni uNgizwe Mchunu, owayekhulume amagama ahlaba ephukela kumholi we-EFF, uMnuz Julius Malema.
Emcimbini kuzobe kukhona uRingo Madlingozi noNtando Duma ozophatha uhlelo ngokubambisana nozakwabo Mr Magic. Ngaphandle kwabo kukhona amaciko ahlukene angahlangene neqembu okubalwa nesilomo somsakazi woKhozi FM uMC Tshatha. Bakhona nabaculi abahlukene okubalwa uJumbo, Igcokama Elisha, Babes Wodumo, Young Stunna, Gatsheni, Big Nuz, Big Zulu, Khuzani, Dj Tira, Dladla Mshunqisi nabanye.