AMACIKO nabanikazi bezindawo zokujabula eThekwini badlulise amazwi enduduzo emndenini wakwaZama. Lama ciko ahlangane eMashamplanes eChesterville, abe eselibhekisa kwaJabulani ‘Jigga Money’ Zama odlale indima enkulu kwezikaqedisizungu eThekwini. UJigga udlule emhlabeni ngoMgqibelo kanti ubengumsunguli aphinde abe umphathi weYadini Lounge
Amaciko amaningi udumo aluthole endaweni yakhe uJigga, edume ngezithombe ze-Walk Yodumo. Abaculi abafana noMondli and Merlon, DJ Tobzela, DJ Meech, DJ Sjerere, Bullistic, Professor, DJ Sox, DJ Bongz, T'zozo abekhona kwaJigga ukuzobhonga emswaneni.
USobz ongunobhala wenhlangano emele amaciko eThekwini, uthe lokhu bakwenza kunoma yiliphi iciko elilahlekelwe. "Yize uJigga ebengelona iciko kodwa utakule amaciko amaningi amanye wawavundulula, yingakho silana."
UJigga ubephinde asize nalabo abasaqala amabhizinisi ngefenisha nangokunye.
Phakathi kwabanikazi bezindawo bekukhona, uSiphiwe Mcanyana we-Artizen Lounge, uBonga Shange eMashamplanes, uTate Mchunu weTate Kasi Grill, uSimo Shange we-Empire, uMagu Dlamini weMoyito, uDerrick weThe Zone, Sbu weMojos nabanye.
Kusasa kuzoba nenkonzo yesikhumbuzo e-The Oasis eMlazi bese yena efihlwa ngoMgqibelo. Eminye imininingano ibingakaqinisekiswa.