UKUSABALALA kwezithombe zomlingisi wethelevishini oyintandokazi kwabesifazane, uThembinkosi Mthembu, emi nowesifazane befaniselene, kususe igidigidi njengoba kuthiwa ubeshadelwa.
Abanye bebethi ubehambisele ingoduso yakhe umkhehlo. Noma lingavelanga igama lentokazi avela emi nayo kodwa kukhona abathe iyisithandwa sakhe sakudala futhi ayefunda naso.
Abesifazane bebekhihla isililo ezinkundleni zokuxhumana njengoba kuhlala kuvela ukuthi bayazifela ngaye. Bekukhona nabamhaliselayo, bethi beluluhle usuku lwabo nesithandwa sakhe. Abanye bebencoma baze bamthakazele bethi, “Siyakubongela Mvelase nonkosikazi wakho omusha.”
Abesifazane abebekhala bebebuzana bodwa ukuthi uThembinkosi angabagila yini ngokuthi avele ashadelwe? Abanye bebethi bayoze bamvume uThembinkosi bathi bhuti kuyena.
Kuphinde kwavela ne-video lapho abebuzwa khona ukuthi angazixolisela athini kwabesifazane base-Ladies House. Uvele wabuza ukuthi axolisele ini ngoba yena uziyele embondweni kamngani wakhe.
Nakuba kunjalo kodwa kukhona obekubonakala ukuthi baphatheke kabuhlungu kangangoba bebeze bahlaziye lo wesifazane abebethi akekho ezingeni likaThembinkosi. Kukhona nabaze bathi emidlalweni ahlala elingisa kuyona ushada nabesifazane abahle kodwa uma eseshadelwa okwangempela akathathi umuntu okuleli zinga.
Abanye bebebaphoxa ngokuthi noma bangakusho lokho kodwa lo wesifazane ukuthole konke ngoba uyena ogcine efakwe indandatho.
UThembinkosi ungumlingisi oyintandokazi kwabaningi futhi unconywa nangekhono lakhe ekulingiseni. Cishe kuzona zonke izindawo azilingisayo kwithelevishini ushiya ababukeli bedelile. Phakathi kwemidlalo agqame kuyona singabala i-The River lapho ayedlala khona indawo kaMabutho, edume netemu elithi: “Mtaka gogo.” KwiShaka Ilembe nakhona kwakubatshazwa ikhono lakhe edlala indawo yokuba yinkosi yakwaMthethwa. Kwi-Adulting kuShowmax nakhona wenze ezibukwayo edlala indawo kaBonga okunguyena kuphela ophumele kubangani bakhe kulo mdlalo.
Kweminye imidlalo namafilimu, singabala iThe Gamechangers, Kalushi: The Story of Solomon Mahlangu, ifilimu iNgeculo, i-Outlaws kwiShowmax kanti usanda kuthola indondo yeBest Actor kumaSimon Mabhunu Sabela Film and Television Awards ngokulingisa kwiShaka ILembe.