UKWEPHULA kukaCaster Semenya irekhodi likaHeide Seyerling le-400m ebeselihlale iminyaka engu-18 ayeliqophe kuma-Olympic Games ayeseSydney, e-Australia ngo 2000 kumbeke kwelinye izinga lokungaqhathaniswa nabanye abagijimi.
USemenya uqophe u49.96 okuyisikhathi esisheshayo kuno 50.05 owaqoshwa uSeyerling.
Le mpumelelo kufuze ukuthi izophonsela inselelo i-Athletics South Africa (ASA) ukuthi izibambe ziqine ekulweni nomthetho we-International Association of Athletics Federation (IAAF) ozomvimbela ngomuso ukuthi angagijimi kuleli banga.
Lo mthetho uzovimbela abagijimi besifazane abanamandla emvelo edlulele njengoSemenya ukuthi bangagijimi kwi-400m nakwi-400m hurdles, 800m, 1000m, 1500m waphasiswa umkhandlu we-IAAF ngoMashi.
NgokweReuters, inkampani yabameli iNorton Rose Fulbright. izophikisa lo mthetho we-IAAF kwiCourt of Arbitration for Sport (CAS) eLausanne, eSwitzerland.
Le nkampani ikubeka kwacaca ukuthi uSemenya yilungelo lakhe njengabanye abagijimi, ukugijima ngokukhululeka engaphoqiwe ukudla imishanguzo.
USemenya uqophe u-49.96s, elandelwa uChristine Botslegwe waseBotswana, endaweni yesithathu kwaba umgijimi waseNigeria uYinka Ajayi.
USemenya usenqoba kabili kuma-Olympics wahlabana kathathu kwi-800m kwi-IAAF World Championships uyingxenye yabagijimi abenza ezibukwayo kwi-African Athletics Championships asongwa namuhla e-Stephen Keshi Stadium, e-Asaba, eNigeria.
Ukunqoba kukaSemenya kumnyusele kwelokhozi ngenxa yokuthi usewaphethe wonke amarekhodi akuleli okungelika-400m, 800m, 1000m nelikai-1500m.
Le ntokazi eyaqala ukugqama inqoba umqhudelwano womhlaba owawuseBerlin eGermany ngo 2009, iqeqeshwa nguMichael “Sponge” Seme iphinde yathola okunye ukuhlonipheka ifakwa yi-African Athletics Confederation ohlwini lwabagijimi abavelele e-Afrika (Hall of Fame). Abanye abagijimi abafakiwe ngabaseNigeria uBlessing Okagbare-Ighoteguonor no-Olusoji Fasuba, uKenenisa Bekele no-Almaz Ayana bobabili abaphethe amarekhodi omhlaba ku-10 000m.
Omunye umgijimi wakuleli ofakwe ohlwini lwabagijimi abahamba phambili e-Afrika uWayde van Nierkerk ophethe irekhodi lomhlaba kwi-400m.
UVan Niekerk akakwazanga ukuyoyibamba e-Asaba ngenxa yokuthi usalulama.
“Bekuvele kuyiphupho lami ukwenza usub-50 seconds, ngikholwa wukuthi bekuyisikhathi esifanele ukugijima ngendlela esezingeni. Uma ungumgijimi webanga elimaphakathi kumqoka ukuzibamba ziqine zisuka nokuficwa u-150m usukwelinye igiya, ” kusho uSemenya.
Abanye abagijimi bakuleli abaqhubekile nokuphakamisele phezulu ifulegi laseMzansi kube ngo-Akani Simbine, Emile Erasmus, Simon Magakwe and Henricho Bruintjies abathole indondo yegolide kwi-4x100m relay.
Olunye ulwazi lutholakale kwiThe South Africa.