LIZOBUYA lizovikela isicoco ihhashi elanqoba iHollywoodbets Durban July nyakenye, uWinchester Mansion, njengoba seluqinisekisiwe uhlu lwalawo azongenela umjaho wanonyaka.
Awu-24 amahhashi abefake izicelo zokuba yingxenye yalo mjaho omkhulu ozobanjelwa eHollywoodbets Greyville Racecourse ngoJulayi 6.
Angu-18 amahhashi asohlwini oluzoqala kanti mabili alindele ukuvala izikhala uma kwenzeka kuba khona izinkinga. Asale ngaphandle Imilenzeyokududuma, Indian Ocean, Narina Trogon noMucho Dinero.
UWinchester Mansion uzobuya nojokhi owayemgibele ngesikhathi enqoba, uKabelo Matsunyane. Isiteki salo nyaka siwu-R5 million.
Kubhekwe ukuthi aphinde amiswe kabi uSee It Again, ozogitshelwa uPiere Strydom, okuyihhashi alishiya kancane nyakenye, noGreen With Envy, ozogitshelwa uCraig Zackey.
UJames Crawford weCrawford Racing, oyindodana kaBrett Crawford abangabanikazi baWinchester, uthe bagculisekile ngokuthi uzoqala umjaho ku-Gate 9 futhi balindele okuhle kuleli hhashi nakuMatsunyane.
“UWinchester uzodlala endaweni enhle. Uzokwazi ukulandela isivinini umjaho ozoqala ngawo futhi sinethemba lokuthi uzowuqeda kahle. Siyawahlonipha amahhashi azoqhudelana nawo kodwa asikho ngaphansi kwengcindezi,” kusho uCrawford.
“Uma ihhashi sesililungiselele umjaho iyehla ingcindezi, kwande ukuzethemba. Siwubheke ngabomvu umjaho. UKabelo naye usesimweni esihle ngokomqondo futhi usejwayele ukugibela amahhashi anqobayo. Yena noWichester bayazana kakhulu, kufana nokuthi bangabangani.”
Ihhashi lokugcina ukunqoba lo mqhudelwano iminyaka emibili ilandelana uDo It Again, owawuthatha ngo-2018 nango-2019. Ujokhi wokugcina ukwenza lokhu uRichard Fourie, owadla umhlanganiso no-Do It Again ngo-2019, noBelgarion ngo-2020.
Amahhashi azoqala iHollywoodbets Durban July: Royal Victory, 2. Barbaresco, 3. Without Question, 4. Future Swing, 5. Green With Envy, 6. Shoemaker, 7. Aragosta, 8. Purple Pitcher, 9. Winchester Mansion, 10. See It Again, 11. Oriental Charm, 12. Son of Raj, 13. Meridius, 14. Master Redoute, 15. Cousin Casey, 16. Double Superlative, 17. Flag Man, 18. Future Pearl.
Amahhashi amabili angama-reserve: Hluhluwe, Hotarubi.