USIHLALO waMaZulu, uSandile Zungu, uyakuchitha ukuthi umqeqeshi uVusumuzi "Kanu" Vilakazi uqashelwe ukuzocuthela umsebenzi wokuqeqesha isikimu se-Betway Premiership esiphekwa kaPablo "Cijimpi" Martin waseSpain.
Emasontweni edlule, kumangale abantu abaningi Usuthu lumemezela ukuthi uVilakazi uzoqeqesha iqembu le-DStv Diski Challenge (DDC). Lokho kwenzeke emuva kwezinsuku ezimbalwa ehlukane ne-Richards Bay FC.
Njengomqeqeshi osefike kwezwakala esigabeni esikhulu, uVilakazi bekulindeleke ukuthi ajoyine elinye lamaqembu adlala Premiership.
Ngaphambi kokujoyina AmaZulu, bekuvele ukuthi uzojoyina iSekhukhune United egcine ibuyise uLehlohonolo Seema noKaitano Tembo. Nokho kugcine kungavunyelwananga ngobekuxoxwa ngakho.
Ukuqashwa kukaVilakazi OSuthiwini kuqubule izinkulumo zokuthi kuzochushwa ngaye ukuthi angene esikimini esikhulu uma ehluleka uCijimpi onikezwe umbandela wokubeka leli qembu kwamane aphezulu kwi-Premiership.
UZungu utshele Isolezwe ukuthi akukho okufihliwe, uVilakazi uqashwe ngenxa yamagalelo akhe.
"Siyamhlonipha uVilakazi, yingakho simqashile. Sesisebenzise imali eningi sithenga abadlali, sesifikile isikhathi sokuthi sizikhiqizele abadlali. Yebo asithenge sibuye sizikhiqizele. Okuhle ngoVilakazi ukuthi unasosonke isipiliyoni. Wenze izimanga esigabeni esikhulu,’’ kusho uZungu.
UVilakazi osezakhele igama ebholeni lakuleli, wagqama esadlala kwi-Lamontville Golden Arrows emnyakeni edlule ephuma eGauteng. Emuva kokuphanyeka amakhokho emgibeni, usihlalo waBafana Bes’thende uMato Madlala umnike isikhundla sokuqeqesha isikimu seDiski.
Ngokuqonda usikompilo lwaleli qembu ugcine esebanjiswa esokuqeqesha iqembu elikhulu. Wagcina enikwa izintambo ngokuphelele. Ngokubambisana noMabhuti Khenyeza owayedlala kuyona i-Arrows, ngo-2023 waqashwa yiChippa United njengosomaqhinga.
UVilakazi wajoyina iBay ngoDisemba nyakenye ezovala isikhala sikaTembo.
Ngaphansi kobuholi bakhe iqembu lagcina liqede endaweni ka-15 kwi-log, lagcina lidlale kuma-Play Off. Izinsolo zokuthi uVilakazi uyahamba zaqala ukuvela ngesikhathi iBay yethula abaxhasi, iPhakwe Gas, ezinyangeni ezedlule. Isikhulu esiphezulu sale nkampani, uThabiso Tenyane, sacashunwa sithi iqembu lizoqasha umqeqeshi wezinga eliphezulu. Isikhala sikaVilakazi kwiBay, sivalwe nguBrandon Truter.