UMQEQESHI weChippa United, uThabo September, akakuboni okuzobaxaka nge-Orlando Pirates abazobhekana nayo emdlalweni weDStv Premiership nakuba bezoshaya ngesikimu esihlukile.
IChilli Boys izovakashela eZimnyama e-Orlando Stadium, eSoweto, koweligi namuhla ngo-7.30 ebusuku. Sekungokwesibili la maqembu egijimisana emidlalweni ilandelana. Ngempelasonto edlule iChippa ikhale ngaphansi ngo 3-1 kwiPirates emdlalweni owandulela owamanqamu weNedbank Cup phambi kwezinkumbi zabalandeli bayo eNelson Mandela Bay Stadium, eBhayi. Lo mdlalo ulandelwe yizinkulumo zokuthi umqeqeshi wePirates, uJose Riviero, uchaphe ngenhlamba ibhentshi leChippa. Lokhu kungenzeka kuphinde kwenyuse imimoya emabhentshini womabili kowanamuhla.
USeptember, oqeqesha iChippa ngokubambisana noKwanele Kopo, uthe lo mdlalo weligi ngeke ushube njengowomkhumulajezi.
“Konke kuhamba kahle eqenjini emuva komdlalo weNedbank nePirates. Lo mdlalo uzoshuba kodwa ngeke ufane nowangempelasonto edlule. Umdlalo weligi nowomkhumulajezi awufani. Kodwa akukho engikubona kuzoba nzima kwazise iPirates besivele siyihlelele ngaphambi koweNedbank Cup. Kulokhu sidlalela amaphuzu ngakho siyakwazi okufanele sikulindele kwiPirates,” kusho uSeptember.
IChippa isendaweni ka-10 kwi-log yePremiership ngamaphuzu angu-32 emuva kwemidlalo engu-26. IPirates, esendaweni yesithathu ngamaphuzu angu-46 emuva kwemidlalo engu-26, ilwela ukuqeda endaweni yesibili ukuze izibekisele indawo emaqenjini azodlala kwiCaf Champions League ngesizini ezayo. Ngokusho kukaSeptember, bona abasenayo ingcindezi kwazise sebekufezile abebekubekelwe ngusihlalo weqembu, uSiviwe Mpengesi okuwukuvika izembe.
“Sizosishintsha isikimu ngoba sesikwenzile esibekelwe khona okuwukusiza iqembu lihlale kwiPremiership ekupheleni kwesizini. Emidlalweni emine esisalele, sizodlalela ukuqoqa amaphuzu esingakwazi ukuwathola. Ngeke sizibekele imigomo emisha njengokungena kwi-Top 8 ngoba bekungekho lokho emigomeni ebesibekelwe yona,” kusho uSeptember.
IChilli Boys izophinde idlale ngaphandle kwesithenjwa sayo uGoodman Mosele osalimele. Kuvele ukuthi uyoze abonakale uma iChippa isibhekene neLamontville Golden Arrows eMpumalanga Stadium, eHammarsdale ngeSonto ntambama. Nokho iChilli Boys izokwamukela injini yasesiswini uBaraka Majogoro waseTanzania obedonsa isigwebo samakhadi ngesikhathi leli qembu libhekene nePirates ngempelasonto edlule. Umgadli uBienvenu Eva Nga naye uzobe engekho kulandela ukuphuma ngekhadi elibomvu kowePirates.
Imidlalo yeDStv Premiership kuleli sonto:
Namuhla - Ngo-7.30pm: Cape Town City v Moroka Swallows (Athlone Stadium); SuperSport United v Sekhukhune United (Lucas Moripe); Royal AM v Cape Town Spurs (Harry Gwala); Kaizer Chiefs v TS Galaxy (Peter Mokaba Stadium).
Kusasa - Ngo-7.30pm: Golden Arrows v Mamelodi Sundowns (Mpumalanga Stadium); Orlando Pirates v Chippa United (Orlando Stadium); Stellenbosch v AmaZulu (Danie Craven); Polokwane City v Richards Bay (Old Peter Mokaba).