AKAFUNI ukugxila kweyesicoco seligi yeDStv Diski Challenge umqeqeshi weMamelodi Sundowns, uSinethemba Badela, ezakhe eziqhubekile nokuhlala esicongweni ngempelasonto.
ISundowns yehlule iSuperSport United ngo 3-0 ngoMgqibelo eTsakane Stadium, eGoli, phezu kokudlala ngaphandle kwezethenjwa eziseqenjini lesizwe lika-Under 20. Emuva kwemidlalo yeDiski engu-23, amaBrazilians aseqhulwini ngamaphuzu angu-53. Awayazi induku emidlalweni engu-10 yakamuva. ISundowns idlale ngaphandle kukaThato Nkabinde, Mahlatse Mampane, Kutlwano Letlhaku noSiyabonga Mabena abaseqenjini lesizwe eliqeqeshwa nguRaymond Mdaka noReneilwe Letsholonyane.
UBadela uthe akaneme ngendlela abadlale ngayo kodwa uyawajabulela amaphuzu.
“Ngijabule ngamagoli amathathu, ngijabule ngamaphuzu amathathu nangokuthi asingenelwanga yigoli. Kodwa angeneme ngendlela esidlale ngayo. Mhlawumbe ngalesi sikhathi sesizini kufanele ngikwamukele uma ubheka ukuthi bekufanele senze izinguquko eziningi. Esiwombeni sokuqala senze izinguquko eziningi ebesingakaze sizenze. Leli qembu alinikani amathuba amaningi okushaya amagoli kodwa namuhla ngokwami bekufanele kube ngu 6-5. Siphisane ngenqwaba yamathuba. Kodwa ngisaziqhenya ngomsebenzi wabadlali,” kusho uBadela.
Nakuba iSundowns ibukeka isinethuba elikhulu lokudla isicoco seDiski kodwa ezithendeni zayo kukhona iStellenboch ewine iligi ngo-2022. La maqembu azotholana phezulu ngempelasonto ezayo eKapa emdlalweni ongase ucacise ngelizoba ngompetha besizini ka-2023/2024.
UBadela ongomunye wabaqeqeshi abasha kwiDiski, uthe akabhekile okuzokwenzeka ekupheleni kwesizini.
“Sifuna ukwenza kangcono kunalokhu kwanamuhla. Angiyithandanga indlela esidlale ngayo. Azikho izaba zokuthi besenze izinguquko kodwa iqembu kufanele lithuthuke. Ngifuna ukubona iqembu lenza kangcono emdlalweni ozayo. Ngifuna ukubheka umdlalo ngamunye. Asibhekile umdlalo wokugcina wesizini. Sibheka ozayo kuphela okuyiwona obaluleke kunayo yonke kule sizini. Uma siqhubeka nalo moya kungakhathaleki ukuthi sinabo bonke abadlali noma cha, sisakholwa ukuthi singawina. Sinalo ithuba (lokuwina iligi) kodwa okumqoka kimina wukubona abadlali bekhula, bethuthuka. Yilokho okubalulekile kimina okwamanje,” kusho uBadela.
Imiphumela yemidlalo yeDiski: AmaZulu 0-2 Golden Arrows; Royal AM 1-3 Richards Bay; SuperSport United 0-3 Mamelodi Sundowns; Moroka Swallows 2-1 TS Galaxy; Cape Town Spurs 2-1 Stellenbosch; Cape Town City 4-1 Chippa United ; Polokwane City 1-1 Sekhukhune United; Orlando Pirates v Kaizer Chiefs.