ISUPERSPORT United ilahle ithuba lokunethezeka endaweni yesibili kwi-log ye-DStv Premiership ibambana ngo 1-1 neRoyal AM emdlalweni obuseChatsworth Stadium, eThekwini, izolo ntambama.
Kulo mdlalo odlalwe kungubuxhafuxhafu wudaka enkundleni ngenxa yemvula ebeliyishaya izikhawu, iSupersport yiyo ebone inethi kuqala ngekhanda likaBradley “Magwaza” Grobler ngomzuzu ka-25, esiwombeni sokuqala ngemuva kwebhola ebeligotshwe wuPartick Maswanganyi kade kuyi-corner kick.
Leli bese kuyigoli lesishiyagalombili likaGrobler kule sizini njengoba ejahana noPeter Shalulile weMamelodi Sundowns osahamba phambili ngayisishiyagalolunye.
IRoyal AM nayo ivuke emaqandeni yalwela ukuthola elokulinganisa nelivalelwe phakathi wuKabelo Mahlasela ngomzuzu ka-38 kuwububhudubhudu ngaphakathi ebhokisini kuxovwa udaka ngenxa yobumanzi benkundla lagcina libhajwe enethini.
Womabili amaqembu awatholile amathuba kulo mdlalo, ikakhulukazi iSupersport okuyiyona efike kaningi emapalini eRoyal AM kodwa yahluleka yancama ukuthola elokunqoba.
Yize ukuthola iphuzu ekuhambeni ikakhulukazi ngaphansi kwesimo senkundla obekudlalelwa kuso kusho lukhulu kwiSupersport kodwa ukubuya nawo ephelele bekungalisiza leli qembu njengoba lisemshikashikeni wokuqeda endaweni yesibili kwi-log, ukuvula intuba ye-Caf Champions League.
Ngasohlangothini lweRoyal AM ibukeka isabambe ngakho ngaphansi komqeqeshi uJohn Maduka osanda kukhuza ibuya kuleli qembu. IThwihli Thwahla isemshikashikeni wokungaphumi phakathi kwamaqembu ayisishiyagalombili aphezulu kwi-log.