IROYAL AM iqede ukuqagela ngoHappy Jele imemezela ngokusemthethweni ukusayina kwakhe kuleli qembu obesekunesikhashana eyamaniswa nalo, nakuba bungadalulwanga ubude benkontileka ayisayinile.
UJele (36) odabuka eMhluzi, eMiddelburg, ozakhele igama kwi-Orlando Pirates eminyakeni edlule, udedelwe yileli qembu kungalindelekile ngaphambi kokuqala kwale sizini ka-2022/2023 ngemuva kweminyaka engu-16 egijima kulo.
Phambilini uke wayamaniswa neRoyal AM, kodwa kwaba yinto ephelayo, njengoba igcine isivuthwa eyokujoyina kwakhe kuleli qembu abonakale ezilolonga nalo ngaphambi kokuba limemezele ngokusemthethweni ngokumsayinisa.
Ukujoyina iRoyal AM kukaJele oseyinkunzi emidwayidwa, kubukeka kuzoba yisixazululo odongeni lwasemuva lwaleli qembu olubukeka luxega muva nje, nakuba kubukeka kusazomthatha isikhathi ukubuyela efomini ngenxa yokuthi sekunesikhathi eside engadlali kusukela eshiye kwiPirates ngoJulayi.
Uzobanga ijezi nezitobha okubalwa kuzo uRicardo Nascimento, uLesego Manganyi ongukaputeni, uThabo Lingwati, noPhilani Cele.
I-AM isingenelwe ngamagoli angu-26 emidlalweni engu-18 yeDStv Premiership esayidlalile kule sizini, okuyinkomba yokuvuza kodonga lwayo lwasemuva.
IThwihli Thwahla ebuya esibhaxwini sika 2-0 esithole kwiKaizer Chiefs ngeledlule, izobhekana neLamontville Golden Arrows koweDStv Premiership, ePrincess Magogo Stadium, KwaMashu, ngoMgqibelo ngo-3 ntambama.