KULINDELEKE ukuthi atheleke oLundi namhlanje ntambama uNgqongqoshe Bheki Cele wamaPhoyisa, ozobe ehambisana noKhomishana wamaPhoyisa kulesi sifundazwe uGeneral Nhlanhla Cele.
Inhloso yokuya oLundi kukaCele wukwenza isiqiniseko sókuthi konke sekume ngomumo ngomngcwabo woMntwana Mangosuthu Buthelezi waKwaPhindangene, odlule emhlabeni ngoMgqibelo ngemuva kokuxinwa wukugula.
Njengoba umngcwabo ususezandleni zikahulumeni futhi uzohanjelwa nanguMengameli Cyril Ramaphosa kumele kwenziwe isiqiniseko sokuthi ezokuphepha ziqinile.
Umngcwabo kulindeleke ukuthi uzohanjelwa yizinkumbi zabantu ezizobe ziluqhamukisa kulo lonke leli, ngisho nasemazweni aphesheya.
Amabutho abeseqalile ukutheleka. Lokhu kubonakale enkonzweni yesikhumbuzo ebisePrince Mangosuthu Regional Stadium oLundi, izolo.