IPHETHE kabi ingxabano yezithandana isoka libulala intombi ngesibhakela eKlerksdorp, ngeSonto.
Kuthiwa lezi zithandani bezinabangani bazo endlini yomngani eseBrakspruit, ngaphandle kwaseKlerksdorp, ngesikhathi kuqubuka ingxabano.
“Imibiko esiyitholile ithi umgilwa wuyena ohlasele umsolwa kwaze kwaba wukuthi umsolwa uyaziphindiselela ngokumshaya ngezibhakela waze wawa umgilwa,” kusho okhulumela amaphoyisa seNorth West.
Kuthiwa umshiye lapho phansi umgilwa bahamba, kwaze kwabuya umnikazi wendawo wazama ukumvusa kodwa kwacaca ukuthi usethule.
“Umnikazi wendawo utshele abangani bakhe nesoka likamgilwa kwabizwa i-ambulensi. Abezimo eziphuthumayo bafike baqinisekisa ukuthi intombi ishonile.”
Liboshwe lapho isoka labekwa icala lokubulala. Kulindeleke ukuba livele eNkantolo yeMantshi eKlerksdorp, ngoLwesibili.