UMENGAMELI wezimantshi KwaZulu-Natal, omisiwe emsebenzini, usolwa ngokuthumela uzakwabo owayeyimantshi isithombe somphambili wakhe, inkinga engalawuleki yokugembula eCasino, ukugwazisa ngemali nangesinene kwababegaqele izikhundla zokuba izimantshi.
UMnuz Sibusiso Eric Nzimande usolwa nangokushaya ucingo izikhawu ezingu-16 eshayela owayengumsolwa ecaleni elithinta ukuqashwa kwebhilidi okwakusolakala ukuthi kudayiswa kulona izingane.
Lobu obunye bobufakazi obethulwe iphoyisa elingumphenyi uColonel Jason McGray eThekwini.
UMcGray uveze nokuthi yayiza ngohologo iyindimbane imali eyayithunyelwa kuxhaxha lwama-akhawunti kaNzimande.
Le mali uthe kwathi uma ephenya, enye kwavela ukuthi iqhamuka ebantwini iningi labo elafika lisanda kuqokwa ezikhundleni zokuba izimantshi okwesikhashana.
UMcGray ubekade egeqa amagula esigcawini esiqondisa ubugwegwe uNzimande obhekene namacala angu-162.
Leli phoyisa belikade leluswa ngemibuzo ugalagala lommeli omele iKhomishini yeziMantshi, eshushisa uNzimande, u-Advocate Sipokazi Poswa-Lerotholi
UMcGray uthe wayazi ukuthi uphenya mayelana nezinsolo zenkohlakalo ethinta izimantshi nabameli ngakho kwakungamele axhamazele enze amaphutha ophenyweni lwakhe.
“Ummangali uNkk Gumede (Lindelwa, owayeyimantshi ebambile) encwadini ayenza efungelwe wathi kukhona lapho athunyelelwa khona umqhafazo uNzimande. Umqhafazo kwakuyisithombe esasiveza isitho sikaNzimande sangasese. Akanginikanga leso sithombe kunalokho wathi ucingo lwakhe lwafa, kwalahleka izinto eziningi ezazikulona,” kusho uMcGray.
UNkk Gumede waqokelwa esikhundleni sokuba imantshi okwesikhashana ngo-2011.
UMcGray uthe encwadini efungelwe kaNkk Gumede, wayephoqwa uNzimande ukuthi amkhokhele emsabisa ngokuthi uma engakhokhi noma engalali naye uzomxoshisa emsebenzini awutholelwa uyena.
UMcGray uthe uNkk Gumede wagcina esekhokhele uNzimande uR140 000 eminyakeni emibili.
“Lo mmangali waveza nezinsolo zokuthi uNzimande wamtshela ukuthi baningi asebenza nabo ayesezimbandakanye nabo ngokocansi. UNkk Gumede waveza nokuthi uNzimande unenkinga yemali ngenxa yokugembula kwakhe,”
Umphenyi uthe imali yayithunyelwa kuNzimande ifakwa kuma-akhawunti akhe amaningi asemabhange ehlukene.
Uthe wenza jphenyo olunzulu olubandakanya izingcingo eziqoshiwe, izitatimende zasemabhange nemininingwane yamaCasino akhona kuleli efuna ukuthola kabanzi ngoNzimande.
Ikhomishini isola uNzimande ngokugembula ngesikhathi somsebenzi.
Isigcawu siyaqhubeka namuhla.