USOMABHIZINISI odumile futhi ongumnikazi weqembu lebhola AmaZulu, uMnuz Sandile Zungu, usenguShansela omusha weMangosuthu University of Technology (MUT).
Izindaba zokuqokwa kukaZungu zidalulwe yiMUT esizindalwazini sayo, lapho ibisho ukuthi uZungu uthatha izintambo kuNksz Lindiwe Sisulu, obekulesi sikhundla. Ihlandla likaZungu liyoze liphele ngo-2026 nokusho ukuthi uzohlala iminyaka emine esikhundleni.
I-MUT ithi isinqumo sokuqoka uZungu sithathwe emhlanganweni womkhandlu wenyuvesi obuhleli ngenyanga edlule. Bathe abangabazi ukuthi uZungu ufanelwe wumsebenzi ngoba unamava kwezamabhizinisi futhi neziqu zemfundo anazo ziyamvuna. UZungu enjalo nje, usenqobe izindondo eziningi ngenxa yamagalelo akhe kwezamabhizinisi.
Uqokelwa kwesikaShansela nje, kade esematheni kulo nyaka engenele umbango wesikhundla sikasihlalo we-ANC KwaZulu-Natal, wagcina engatholanga ukwesekwa ayekufuna ukuze akhethwe.