UYISE wowesifazane owashiswa nemoto emathuneni eMolweni, eThekwini, uthi uzozingcwabela yena indodakazi yakhe emuva kokuthi umyeni wayo elahlwe yicala lokubulala.
UMfundisi Thanduxolo Warren Bada (72) onguyise kamufi, uNkk Khulukazi Ndlovu (39), uthe uzokwenza isitifiketi sokushona sikamufi ongangcwatshiwe kusukela abulawa ngo-Ephreli 3, 2020.
Umlotha nezingcucu zamathambo kukamufi kusagcinwe emakhazeni kwazise uBada wathi ulinde isiphetho secala.
NgoLwesihlanu, iJaji Mohini Moodley, leNkantolo eNkulu yaseThekwini, lilahle ngecala lokuthumba nelokubulala okuhleliwe uSfiso Professor Ndlovu (49).
UNdlovu ulahlwe nangecala lokucekela phansi impahla okuyimoto kamufi iKia Picanto ashiselwa kuyona umufi.
IJaji Mohini kulindeleke ukuthi ligwebe uNdlovu ngoNovemba 17, nonyaka.
UBada udalule ukuthi ujabulile ukuthi iqiniso livelile ukuthi uNdlovu owabulala ingane yakhe ngendlela eyisihluku.
UBada uthe uNdlovu ubekade ephika ukuthi uyena owabulala indodakazi yakhe.
“Ngangimlalele enkantolo ethi akusiyena owabulala umfazi wakhe. Wayethi umfazi wakhe walahleka kanti uyazi kusukela ekuqaleni ukuthi wamenzani umntanami,” kuchaza uBada.
Uqhube wathi ukulahlwa ngecala kukaNdlovu ngeke kumvuse umufi kodwa kumthoba amanxeba ukwazi ukuthi uyena owabulala.
UBada odabuka eMthatha, e-Eastern Cape, uthe uzoza eThekwini ezokwenza isitifiketi sokushona sikamufi bese izinsalela zakhe abuyele nazo ekhaya.
“Le nto ayenzile (uNdlovu) yimbi kodwa into engijabulisayo ukuthi iqiniso livelile ngakho kumele asijezele isenzo sakhe. Uma wonile kumele ukujezele ukona kwakho,” kusho uBada.
UNdlovu ulandule kwaze kwaba sekugcineni ethi akazi wayaphi umkakhe, wezwa enkantolo ukuthi akasekho futhi akukho okubambekayo anakho ngokushona kwakhe.
Umshana kaNdlovu, uMnuz Lindela Vezi, wazifaka obishini ethula ubufakazi eseka umalume wakhe egcizelela ukuthi wayekade elele ngobusuku okwathunjwa ngabo inkosikazi yakhe.
Ijaji lathi kumele avulelwe icala lokuqamba amanga efungile uVezi, lithi kuzoba yisifundo nakwabanye abantu abacabanga ukuthi inkantolo indawo yokuzoqamba amanga.
Ijaji lathi uVezi wayekade ehubhuza amanga futhi ekhombisa indelelo ngesikhathi efakaza ephicwa ngemibuzo umshushisi u-Advocate Thabani Buthelezi.