KUBIKWA ukuthi isihlasele umuntu oyedwa ingwe eyeqe epulazini laseWalkerville eningizimu yeGoli ngempelasonto.
Le ngwe eneminyaka eyisishiyagalombili ibigcinwe epulazini inakekelwa wumnikazi wayo ngesikhathi yeqa.
Amaphoyisa kanjalo nethimba lenhlangano ebhekele ukuphepha kwezilwane bakhona kule ndawo njengoba kunamahlebezi angakaqinisekiswa okuthi ibonakele kule ndawo.
Owesifazane oyisakhamuzi kule ndawo utshele abezindaba ukuthi uphathina wakhe uhlaselwe yile ngwe yesifazane.
“Siphume nomunye umakhelwane siyobheka ukuthi kwenzenjani ngesikhathi ngizwa uphathina wami ememeza efuna usizo. Simthole eleli phansi elimele emlenzeni, simfake endlini sizama ukumsiza ngesikhathi sizwa abantu bememeza phandle bethi ingwe isihlasele inja,” kusho owesimame.
UMasipala waseMidvaal unxuse izakhamuzi zakule ndawo ukuba ziqaphele ngoba isize yathola igazi ngaleyo ndlela iyingozi kakhulu ebantwini.
