KUHLONISHWE nengwazi engasekho yomculo wesicathamiya, uSolomon Mpopoli Linda Ntsele ngomklomelo we-Order of Ikhamanga in Gold ngesikhathi uMengameli wezwe uMnuz Cyril Ramaphosa echoma amaqhawe namaqhawekazi akuleli e-Union Building ngoLwesihlanu.
USolomon waseMsinga, ePomoroy, wazakhela udumo ngokuqamba inoni lengoma eyaduma umhlaba wonke esihloko sithi Mbube (okusho ibhubesi). Leli culo labuye lenziwa kabusha ngesiNgisi nguGeorge David Weiss, selibizwa ngeThe Lion Sleeps Tonight futhi labuye labizwa ngeWimoweh yiThe Weavers ngoNovemba 1951. Labuye laculwa kabusha yizihlabani eziningi zamazwe ngamazwe.
Nakuba lengoma yagwilikisa abaningi kodwa uSolomon wadlula emhlabeni ngomhla ka-8 Septhemba 1962 engenayo ngisho indibilishi.
Yize ebengasekho kodwa ubulungiswa bugcine benzekile njengoba umndeni wakhe uhlafune kahle ngale ngoma. Idolobha adabuka kulo iPomeroy seyibizwa ngeSolomon Linda.
Lo mculi owayengumholi we-Evening Birds uklonyeliswe nokaputeni waMabhokobhoko, uSiya Kolisi nomqeqeshi weBanyana Banyana, uDesiree Ellis ngomklomelo ofanayo. Abanye abahlonishiwe ngoMfundi Vundla weGenerations The Legacy, uMthuthuzeli Ben Nomoyi, Freek Robinson, Tracy Chapman, Peter Tosh nabanye. Umdidiyeli woMkhokha neMbewu, uDuma KaNdlovu, ukhishwe ohlwini lwabahlonishwayo ngenxa yombhikisho we-ANC Veteran's League, emsola ngokuthinteka kwegama lakhe ekugwamandweni kukaSars.