AMAPHOYISA aseqale uphenyo ngomsuka womlilo oshise igumbi lokulala likadadewabo kanozinti weKaizer Chiefs neBafana Bafana u-Itumeleng Khune, uMapule, otholwe abezimo eziphuthumayo eseshonile.
Kubikwa ukuthi lesi sigameko senzeke ngoLwesine ngabo-5 ekuseni kanti kuvela lezi zindaba nje uKhune umenyezelwe esikwatini seBafana esizodlala imidlalo yokuhlungela i-AFCON kule nyanga.
Okhulumela amaphoyisa eNorth West uLieutenant Colonel Adéle Myburgh uthe omakhelwane babone intuthu iqhamuka endlini eseTshing Extension 2 ngaphandle kwaseVentersdorp.
Okwamanje akukacaci ukuthi ubelele yini ngesikhathi kusha ikamelo.
“Babize abezimo eziphuthumayo abathole isidumbu sowesifazane oneminyaka engu-27. Ubesegumbini lokulala elingemuva elele phezu kombhede kwasha kuphela ikamelo langemuva. Uphenyo ngalolu daba luyaqhubeka,” usho kanje.
UMyburgh uphinde waveza ukuthi isidumbu salo wesifazane sishile, kodwa wangenaba ukuthi sishe kangakanani.
Uphinde wakuqinisekisa nokuthi bebekhona abantu endlini kodwa abezimo eziphuthumayo bathintwe omakhelwane.