USHAYWE indiva emngcwabeni womyeni wakhe, uLerato Sengadi, yize ngoLwesihlanu, iNkantolo eNkulu yaseGoli ithe uyinkosikazi egane ngokwesintu nomrepha ongasekho, uJabulani “HHP” Tsambo.
Emngcwabeni kaHHP ngoMgqibelo uLerato akafakangwa emlandweni walo mculi wahlaliswa nasephaseji kuqhubeka inkonzo.
Lokhu kugqamise uqhekeko phakathi kwakhe nabakwaTsambo njengoba beze bayisana enkantolo.
Ekhuluma udadewabo kaHHP, uNksz Ayanda Tsambo, uqhakambise unina wengane yomfowabo ngokubaseka, akazange ambale nakancane uLerato.
Nangesikhathi uninalume womrepha, uMnuz Fezile Govern, efunda umlando akazange ambale uLerato.
Uthe uHHP ushiye abazali, odadewabo ababili, indodana uLeano nomshana.
Isenzo somndeni kaHHP sidonse ukukhuluma kwezokuxhumana, abanye bezwelana noLerato.
Ngesikhathi sekuvalwa inkonzo yomngcwabo, uGovern uthe abantu abazoya emathuneni umndeni nabanezigqebhezana zokungena.
Abaningi babambe umoya bezibuza ukuthi uLerato uzovunyelwa yini emathuneni noma uzosala ehholo.
Yize abaningi bejabulile ngokumbona emathuneni uLerato kodwa badumele ngokuthi ubambe ulayini wayophonsa inhlabathi nowonke wonke.
Kuqale kwayothela abazali bakaHHP, balandelwa odadewabo ababili nendodana yakhe ebiphelezelwa unina ngaphambi kokuthi kuvulelwe izihlobo nabangani.
Umrepha uShuga Smakx ubeseka uLerato emngcwabeni, ubeyingxenye yabamphelezelile eseyovalelisa.
Abanye bosaziwayo ababonakale beyovalelisa uHHP kubalwa uCassper Nyovest, Stoan Seate, Thapelo Mokoena, Slikour nabanye.