BAVELE kancane enkantolo yeMantshi eVredenburg,abasolwa abane ecaleni lokunyamalala kukaJoslin Smith (6).
Phakathi kwabantu ababoshiwe kubalwa unina wengane elahlekile, nesoka lakhe okuthiwa yilona elaliqaphe uJoslin ngosuku alahleka ngoFebhuwari 19, 2024.
UJacques Rowhan Appolis (31), umngani wakhe uSteveno Dumaizio Duwayne Van Rhyn (27), uRacquel Chantel Smith ono-32, ongunina wengane elahlekile, noPhumza Sigaqa (iminyaka yakhe ayitholakalanga).
Ekhuluma nabezindaba phandle kwenkantolo umyeni kaPhumza, udalule ukungenami ngendlela okusingethwe ngayo udaba. Uthi kwaqale kwaboshwa yena, nomkakhe nezingane zabo ngesikhathi kuvela imibiko yokunyamalala kwengane.
“Salala usuku esitokisini ngosuku olulandelayo sakhishwa mina nezingane kwasala umkami. Kungiphatha kabi ukuvalelwa komkami ngoba akahlangane nayo yonke lento eyenzekayo,” kusho umyeni kaPhumza Sigaqa.
Lo mlisa usola ukuthi umkakhe waboshwa ngoba behlala endaweni eyodwa nomama wengane elahlekile futhi bayazana. Uthi uyayeshwama imibiko yokuthi ngumkakhe owaxhumanisa isoka likaRacquel, nomngani walo nenyanga okuthiwa yadayiselwa ingane.
Abasolwa babhekene namacala okuthumba, nokushushumbisa ingane. Icala lihlehliselwe ku-Ephreli 1, lapho kulindeleke ukuthi bafake isicelo sebheyili. Umbuso uveze ukuthi uzosiphikisa isicelo sebheyili.