KULINDELEKE ukuthi uMengameli Cyril Ramaphosa ethule inkulumo ayibhekise ezweni namhlanje ebusuku.
Ngokombiko okhishwe yiHhovisi likaMengameli, le nkulumo izokuba ngo-8 ebusuku. Ingqikithi yayo imayelana neNqubomgomo yezangaPhandle yaseNingizimu Afrika nengqungquthela yeBrics ezoqala ngoLwesibili.
Kuvela udaba lwale nkulumo nje, kusanda kukhishwa umbiko wokuthi uMengameli waseChina uXi Jinping kulindeleke ukuthi afike kuleli ngoLwesibili.
Umcimbi wokwamukela uJinping uzokuba ngoLwesibili ekuseni e-Union Buildings ngaphambi kokuqala kwengqungquthela yeBrics ezoqala ngo-Agasti 22, bese igoqwa ngo-Agasti 24.