Kubikwa ukuthi uLerato ngesonto ekuseni uvukele emzini kaHHP Randpark Ridge, eRandburg ephelezelwa amaphoyisa wafike wagqashula amaketango washintsha ukhiye wesango.
SISAQHUBEKA nokushuba isimo phakathi komndeni womrepha ongasekho emhlabeni uJabulani ‘HHP’ Tsambo, nonkosikazi wakhe uLerato Sengadi.
NgoMgqibelo emngcwabeni uLerato akafakangwa emlandweni walo mculi wahlaliswa nasephaseji kuqhubeka inkonzo.
Iphephandaba laseGoli lansuku zonke, iSowetan, libika ukuthi uLerato ngesonto ekuseni uvukele emzini kaHHP Randpark Ridge, eRandburg ephelezelwa amaphoyisa wafike wagqashula amaketango washintsha ukhiye wesango.
Okhulumela umndeni uMnuz Nkululeko Ncana usiqinisekisile lesi sigameko.
“ULerato ufike ngo 1 ekuseni namhlanje (ngeSonto) wagqekeza. Ukhiyele umuntu obesebenza khona nendodana yakhe esebehlale khona kusuke ngo-2004.
UNcana uthe uJabba uyena obenakekela lo msebenzi wasezindlini nendodana yakhe. Uthe umndeni ushaqekile ngesenzo sikaLerato.
“Sekuphele izinyanga uLerato engahlali kuloya muzi. Into exaka wonke umuntu ukuthi ngisho indodana kaHHP ayikwazi ukungena kulomuzi manje,” usho kanje.
UNcana uthe bazosiphikisa enkantolo isinqumo esikhishwe yijaji ngeledlule esikhiphe phambili uLerato njengonkosikazi kaHHP osemthethweni kulandela isitatimende esasishicilelwe umndeni esathi wayeyingoduso kuphela.
Ekhuluma kwiPower FM ngoMsombuluko, ummeli kaLerato uzichithile lezi zinsolo wathi zidicilela phansi isithunzi sakhe. Uthe kuyadabukisa ukuthi esikhathini lapho esazilele ukudlula komyeni wakhe, umndeni kaHHP umthwalisa kanzima.