INTOKAZI yase-Eastern Cape, ebingenele umncintiswano wohlelo iBig Brother Titans kepha yaphuma ngeledlule nophathina wayo, ithi ijabulela ukuthi ayizange imhlaze unina wayo ngesikhathi isesendlini yokuqopha.
UYamkela "Yaya" Mwandla (31), obekubeka sengathi ujola nophathina wakhe uMarvin, waseNigeria, utshele iphephandaba ukuthi akukho nokukodwa ezisola ngakho kulokho ebikwenza ngesikhathi iseyimbangi emqhudelwaneni.
Uthe okusemqoka kuyo ukuthi ikwazile ukuzijabulisa ngesikhathi isendlini yeBig Brother Titans.
"Mina noMarvin besingazinaki izinto ebezenzeka endlini kodwa sinaka obekuqondene nathi kuphela. Kungenzeka ukuthi yisona sizathu esiholele ekutheni sisheshe siphume. Besingenalo uhlelo ebesiphezu kwalo lokunqoba umncintiswano ngoba besiphila impilo ejwayelekile futhi esiyiphila ngaphandle," kuchaza uYaya.
Ebuzwa yiphephandaba ukuthi ngabe yena nophathina wakhe bazoqhubeka yini nobudlelwano babo, uthe okwamanje akakathandi ukwanda kakhulu ngoMarvin.
Phakathi kwezinhlelo athe uzoba matasa ngazo, uthe ufuna ukuqhubeka nokugxila emkhakheni wokumodela nowokulingisa.
"Isitolo sami sokudayisa izimpahla zangaphansi zabantu besifazane siyazama kakhulu. Ngifuna ukuqhubeka futhi nebhizinisi lokucwala ubuso kanjalo nokudayisa imikhiqizo yokuziphaqula," kuphetha intokazi.
Phakathi kwezimbangi ezingakakhishwa endlini yeBig Brother Titans kubalwa uBlaqboi no- Ipeleng (Blaqleng), Juicy J no- Olivia (Juiovla), Blue Aiva noKanaga Jnr (Kaniva), Khosi noMiracle OP (Khosicle) bese kuba uYemi noNelisa Cregx (Yelisa).