UKHALE ngaphansi enkantolo owesilisa esicelweni sakhe sokuphonsela inselelo isinqumo sokulahlwa ngecala nokugwetshwa iminyaka engu-10 ngokubulala owayeyishoshovu.
INkantolo yesiFunda yaseThekwini izolo ichithe isicelo sikaGugulethu Wesley “Matiri” Madonsela (52).
IMantshi uBK Khumalo ithe isigwebo seminyaka engu-10 esinike uMadonsela simfanele emuva kokuthi uMbuso wethule ubufakazi obuqanda ikhanda enkantolo.
UKhumalo uthe ayikho enye inkantolo engafinyelela esinqumeni esehlukile kunalesi asithathile ngakho iyasichitha isicelo sikaMadonsela.
“Wakuhlaba inhlali ukuphonsela inselelo ubufakazi obethulwa wuMbuso enkantolo ngokuthi ungene ebhokisini wethule olwakho uhlangothi ngokwenzeka. Wakhetha ukuthula, wangabethula obakho ubufakazi. Ngakho isinqumo senkantolo siqhamuka ngasohlangothini olwethulwa uMbuso ngoba ngokwakho ayikho into ephathekayo ozivikela ngayo,” kuchaza imantshi.
Imantshi ithe kumcindezelile uMadonsela ukusebenzisa ilungelo lakhe lokungabethuli ubufakazi enkantolo ukuze aveze ubumsulwa bakhe.
UMadonsela ungene enkantolo, esuka ejele laseWestville, egqoke ijezi nebhulukwe okukhakhi. Njengenjwayelo ubephucile ekhanda, ungene wayohlala phansi wabhala u-4 ebhokisini labasolwa. Ubelokhu eqhabula kancane emanzini athengwayo abuye abuke emuva ejeqeza abebezomeseka, amamatheke amise nezithupha.
UMadonsela ubekade esolwa wuPhiko lwezokuShushisa, iNational Prosecuting Authority (NPA), ngokuthi wayengomunye wamadoda amane ahlasela adubula umufi owayengumngani wakhe omkhulu, uSiphelele Nxumalo, owayeneminyaka engu-17.
UNxumalo wadutshulwa wafa eChesterville, eThekwini, ngobusuku bangoFebhuwari 1989.
Ummeli kaMadonsela, uMnuz Bongani Cele, ukhale ngokuthi inkantolo ifinyelele esinqumeni esishaya eceleni ngobufakazi obunamaphutha futhi obushayisana nesitatimende esethulwa wufakazi owathi wabona umufi edutshulwa.
Lokhu kuchithwe ngumshushisi weNPA, u-Advocate Xolani Msimango, onxenxe uKhumalo ecaphuna emithethweni eminingi eyehlukene ukuthi achithe isicelo sikaMadonsela.
UMsimango uthe nakuba eyedwa ufakazi woMbuso owabona kodwa inkantolo ibuhlolisisile yabuthola buqotho ubufakazi bakhe.