KUQALWE ngokucutshungulwa kwesicelo sikammeli kaKelly Khumalo ecaleni lokubulawa kukanozinti we-Orlando Pirates kulandela ukuguqa kwalo ngoSepthemba nonyaka. Inkantolo igcine isichithile isicelo sakhe.
Yize bekulindele ukuthi abameli babasolwa bapheke ngemibuzo uTumelo Madlala ongufakazi woMbuso futhi owayengumngani kaMeyiwa owayekhona mhla ebulawa kepha inkantolo ayiqalanga ngokohlelo kuvela izindaba zokuthi ummeli kaKelly owayeyintombi nomama wengane kaMeyiwa, ufake isicelo sokuthi abuyiswe enkantolo.
U-Advocate Magdaline Moonsamy uthumele incwadi enkantolo ecela ukuthi abuyiswe njengomunye wabaqaphe okwenzeka enkantolo.
Kuzokhumbuleka ukuthi lo mmeli wakhishwa enkantolo ngo-Ephreli, nonyaka, kulandela isicelo esafakwa u-Advocate George Baloyi okungumshushisi woMbuso. UBaloyi waveza ukuthi akukuhle ukuthi kube khona ummeli enkantolo oqapha okwenzekayo uma lowo ammele engakabizwa.
Namuhla uMbuso nabemeli babasolwa u-Adv Tshepo Thobani omele abasolwa abane no-Adv Zandile Mshololo omele oyedwa, bavumelene ngazwi linye lokuthi abasamukeli lesi sicelo.