UGCULISEKILE uNgqongqoshe wezeMfundo KwaZulu-Natal, uNkk Mbali Frazer ngokuthi seziqalile ukuhanjiswa izincwadi ne-stationery ezikoleni zesifundazwe, ukuze kuthi kuvulwa izikole ngonyaka ozayo kushe umsebenzi wokufunda nokufundisa.
UNkk Frazer uhambele isikhungo okugcinwa kuso izincwadi ne-stationery, okusatshalaliswa yinkampani iNdabase Printing eManzimtoti, wafica usha umsebenzi wokuhlela izincwadi.
Kuqale ngenyanga edlule ngaphambi kokuvalwa kwezikole ukuhanjiswa kwezincwadi.
“Ngijabule ngifika kulesi sikhungo ngifica ukuthi kuyasetshenzwa. Ngize kulesi sikhungo seNdabase ukuze ngibheke ibanga eselihanjiwe ukuhanjiswa kwezincwadi ezikoleni. Ngithole ukuthi sekumi ngomumo ukuhanjiswa kwe-stationery ezikoleni.”
Uthe akafuni ukuthi kufike uJanuwari wonyaka ozayo athole ukuthi izincwadi azikho ezikoleni.
“Uma izincwadi zingekho asikwazi ukuqala umsebenzi ngosuku lokuqala. Ngomzuzu wokuvulwa kwezikole kumele kushe umsebenzi wokufundisa.”
Uthe yonke into uyifice ihlelekile, okuseqhulwini kubona wukufunda nokufundisa.
Okhulumela umnyango uMnuz Kwazi Mthethwa, unxuse umphakathi ukuthi uzigade ngelokhozi izincwadi ezithunyelwa ezikoleni.
Uxwayise abazophazamisa ukuhanjiswa kwazo, ukuthi bazobhekana nengalo yomthetho.
“Ngeke sibabekezelele abazophazamisa ukuhanjiswa kwazo ezikoleni, bazobhekana nomthetho. Izincwadi ngezikahulumeni ukusiza abafundi ukuthi kube lula kubona ukufunda. Ukuphazamisa into ethinta ukufunda kwabantwana yinto okungamele umphakathi uyibekezelele.”
Kuke kwakhalwa ngokuthi izikole seziphenduke inkundla yezigebengu ezigqekeza zebe izinto ezehlukene.
Izehlakalo zenzeka kakhulu uma kade kuvalwe izikole lapho kungenwa kuntshontshwe nokudla kwabafundi, amabhodwe okuphekela abafundi, izicabha, amawindi kanjalo nezinye izinto ezifana namakhompyutha nezinye.
NoMengameli Cyril Ramaphosa uke wakhala ngezehlakalo zobugebengu ezenzeka ezikoleni zakuleli.
URamaphosa wanxenxa imiphakathi ukuthi ivikele izikole, kanjalo nempahla yazo.