LUQALILE uhlelo lokunqanyulwa kwezinkontileka zezinkampani ebezinikezwe umsebenzi yisikhwama esibhekelele uxhaso lwezitshudeni, i-National Students Financial Scheme, wokuhlinzeka ngemali okukholakala ukuthi aziwenzanga ngendlela umsebenzi.
Ngenyanga edlule uNgqongqoshe weMfundo ePhakeme nobuChwepheshe, uDkt Blade Nzimande, umemezele ukuhlakazwa kwebhodi elengamele lesi sikhwama, safakwa ngaphansi kweso lomlawuli emva kokuthi kube nezikhalo eziningi ezivele ezikhungweni zemfundo ephakeme nakwabamele izitshudeni ngokungahambi ngendlela kohlelo lokudluliselwa kwemali.
Kuqokwe uMnuz Freeman Nomvalo njengomlawuli kulesi sikhwama, okuwumsebenzi azowenza izinyanga eziwu-12, okuyisikhathi esingavuselelwa uma kusenesidingo.
Ekhuluma esithangamini nabezindaba ebesisePitoli ngoMsombuluko, okokuqala selokhu ephethe lesi sikhundla, uNomvalo uthe lesi sikhwama sithathe amagxathu abalulekile ukulandela izincomo zombiko wenkampani yabameli, iWerkmen Attorneys, owawucubungula iminxa isikhwama okumele sikhuphule amasokisi kuyo ekuphathweni kwaso.
“Phakathi kwezinto ezavela kulo mbiko, okuthiwa azihanjiswanga ngendlela, wukuqokwa kwezinkampani isikhwama esasizokhokha kuzo zona ziyidlulisele kwizitshudeni ezifake izicelo zoxhaso, okuyi-Ezaga Holidings, iCoinvest Africa, iNorraco Corporation neTenet Technologies. Ngiyajabula ukumemezela ukuthi ukunqanyulwa kwezinkontileka zalezi zinkampani sekuqalile namaphepha adingekayo asefakiwe enkantolo. Ukunqamula izinkontileka, iNsfas isebenzisane nabophiko oluphenya amacala abucayi, iSpecial Investigation Unit. Lapho kudingeka khona, sizovula amacala obugebengu,” usho kanje
Uthe ukuqinisekisa ukuthi uhlelo lokukhokhelwa kwezitshudeni emanyuvesi aluphazamiseki, lesi sikhwama sinxuse wona amanyuvesi uqobo ukuthi alekelele kulolu hlelo lokuhlinzekwa kwezitshudeni ngezimfanelo kuze kube sekupheleni kukaJulayi kulo nyaka.
Unxuse zonke izitshudeni, ezifake imininingwane yasebhange engaqondile ezithole umyalezo ozazisa ngalokho, ukuthi ziphinde zifake kabusha imininingwane yazo elungisiwe.
Mayelana nezindawo ezihlala izitshudeni, uNomvalo unxuse bonke abanikazi bezindawo ezizimele abangakhokhelwe ukuthi babhalele lesi sikhwama kwi-email ethi [email protected] babike izikhalo zabo. Uthembise ukuthi ababhale manje bazokhokhelwa ngasekupheleni kwale nyanga kanti abasalile bazokhokhelwa maphakathi nenyanga ezayo.
Uveze ukuthi izitshudeni ezifunda emakolishi, ezibhekelelwe ngaphansi kwalesi sikhwama, imali yazo iqale ukukhokhwa ngenyanga edlule, wanxusa lezo ezingakawafaki ama-akhawunti azo asemabhange ukuthi ziwafake ukuze zikhokhelwe. Uthe zingu-211 591 izitshudeni zasemakolishi eseziyitholile imali yazo kanti ezingu- 7 160 azikakayitholi ngenxa yezingqinamba ezehlukene kubalwa nalezo ezithinta imininingwane yasemabhange.