ITHI ingaba nkulu ingabe isazekeka, lokhu ukuphawula kwabantu ezinkundleni zokuxhumana ecaleni eliphenywa wuphiko lweSIU okuvela kulonaigama likaThula Sindi ongumsiki wengqephu odumile kuleli.
Uphenyo lweSIU luveza ukuthi iNational Lottery Commission (NLC) yaxhasa iZibisibix Non-Profit Company ngo-R5 million, ukuze kutholakale ipulazi lezinkukhu ngoDisemba 2018.
Ithe ingena le mali yabe icazwa ngezindlela ezehlukene, njengoba kubaluliwe kulesi sithombe.
Lesi sithombe sisuse umsindo njengoba kuvela ukuthi imali yasuswa kwi-akhawunti yenhlangano eyathola uxhaso yangena kuma-akhawunti amathathu omlingisi uMoitheri Terry Pheto, okukhona kuwo ne-akhawunti yakhe yangasese, kwabuye kwakhokhelwa uDimakatso Pheto ongudadewabo kaTerry, okhokhelwe kabili. Okudide abaningi ukuvela kwegama likaThula Sindi, owakhokhelwa uR140 000 kuyo yonke le mali.
Kuvela nokuthi lathengwa ipulazi lezinkukhu ngoR850 000, lithengwa owayengusihlalo webhodi leNLC uProf. Alfred Nevhutanda, ngokuvela kwegama lakhe encwadini yokuthenga ipulazi eliseVaal. Kuthiwa ipulazi lathengwa ngegama likaDimakatso Pheto.