UMPHATHISWA woMnyango wezokuThuthukiswa koMphakathi KwaZulu-Natal uNkk Nonhlanhla Khoza uqhakambise iqhaza losonhlalakahle ababhekela inhlalakahle yabantu.
Ukusho lokhu njengoba kugujwa inyanga eyaziwa njengeyokuhlonipha lezi zisebenzi zomphakathi egujwa umhlaba wonke.
Uthe le nyanga eyokukhumbula, ukuqhakambisa nokubonga ukusebenza ngokungakhathali nokuzinikela kwalezi zisebenzi kulo mkhakha.
"Ukubaluleka kosonhlakahle emphakathini wethu ngeke kubukelwe phansi. Kusuka endimeni abayihlakula ngesikhathi sobhubhane i- Covid 19 kuze kufike ekulweni nodlame olubhekiswe kwabesifazane nezingane, bayaqhubeka nokuba ithemba kwabaningi abangenamandla okuzilwela," usho kanje.
Ugcizelele ukuthi bayizinsika ekuqinisekiseni ukuthi imindeni inempilo baphinde bagqugquzele ukukhula nokuzinakekela kwabebecindezelwe.
Uthe ukhathazekile ngenqwaba yabafundele lo mkhakha ababhuquza neziqu emakhaya esifundazweni
Uthe kuyakhathaza ukubona amakhono eduvile ekubeni umphakathi uwadinga
Njengengxenye yokugubha inyanga yabo, umnyango uphinde wahlonipha labo abanikele ngempilo benza umsebenzi wokulekelela umphakathi ukuze usizakale.
Unxuse ukuthi osonhlalakahle bavikelwe zikhathi zonke.
Uthe umnyango uzoqinisekisa ukuthi kunosonhlalakahle oyedwa ewadini isifundazweni sonke ukuqinisekisa ukuthi usizo luyafinyelela kuwowonke amalungu omphakathi.