KUSOLWA ilungu lomndeni kubulawa imenenja yasebhange okuthiwa ihlaselwe yadutshulwa ikubo eMachibini ngaseMandeni, kwashiswa indlu yabadala kwabulawa nemfuyo, ngoMgqibelo ebusuku.
UMnuz Seluleko Mbonambi (36) okuthiwa ubeyiMenenja eNedbank KwaSíqumbe eMandeni, uhlaselwe ekubo, kanti umfowabo kamufi uMnuz Mandla Mbonambi uthe bewumndeni banezinsolo eziqinile zokuthi lesi senzo senziwe omunye wabafowabo obevele esongela umufi.
Elandisa ngokwenzeke ngobusuku okubulawe ngabo umufi, uthe kuqale kwakhonkotha izinja okulandelwe ukuqhuma kwesibhamu kulandelana.
“Kuthe sekuthule ukuqhuma kwesibhamu, ngaphumea endlini ngayobheka endlini kamfowethu ukuthi akalimanga yini kulokhu kuqhuma okwenzekayo, kodwa ngangamfica. Ngithe uma sengibhekisisa egcekeni ngamthola elele eduze kukagandaganda okhona egcekeni enamanxeba okudutshulwa, waphelela ezandleni zami,” kusho uMbonambi.
Uthe kudutshulwe izinja ezimbili, izinkomo eziyisithupha kwashiswa neqhugwana labantu abadala netekisi ebelisegcekeni.
Uthe okwenza basole lilungu lomndeni, ukuthi belinokungaboni ngaso linye nomfowabo ngesikhathi entshontshelwa izinkomo zakhe ezingu-25, kwathi ezimbili zatholwa sezidayisiwe, esigamekweni umndeni osole lona leli lungu, emva kokuthi ababedayiselwe bebalula ukuthi badayiselwe yilona.
Uthe kwaphinde kwantshontshwa ezinye eziwu-30, eziyisikhombisa kuzo zabuye zatholakala, nakhona kuthiwa kwavela igama lalo, okwagcina ngokuthi libe yinkukhu nempaka nomufi.
“Bese kukhona ukusongelana phakathi kwabo kangangokuthi muva nje, ubhalele umufi umqhafazo obuveza ukuthi uyezwa kuthiwa uyamfuna ngesenzo sakhe naye uyamfuna futhi uzomthola kuqala bese eyambulala. Noma singeke siqinisekise ukuthi uyena njengoba kuwumsebenzi wamaphoyisa lokho kepha okwamanje izinsolo ziqinile zokuthi uyazi ukuthi umfowethu ubulawe kanjani,” usho kanje.
Okhulumela amaphoyisa KwaZulu-Natal uColonel Thembeka Mbele uthe kuvulwe icala lokubulala, elokushisa nokucekelwa phansi kwempahla esiteshini samaphoyisa eSundumbili.
“Ngesikhathi amaphoyisa efika, afice indlu eyiqhugwana nemoto eyitekisi ikusha. Isidumbu sikamgilwa oneminyaka engu-36 besiphansi sinamanxeba ayisithupha okudutshulwa emzimbeni. Kusolakala ukuthi abasolwa abathathu abangaziwa bangene emagcekeni baqala ngokudubula izinja nezinkomo ngaphambi kokuthi badlulele endlini,” kusho uColonel Mbele.
Uthe imbangela yokuhlasela ayikaziwa, amaphoyisa ayaphenya.