Abantu nezinkampani ezehlukene bagubhe usuku lokuzalwa kowayengumengameli waseNingizimu Afrika wokuqala wentando yabantu ongasekho uNelson Mandela ngokwelula isandla emiphakathini.
Ithimba leSolezwe lihambisana nenkampani ebhaka izinkwa iBB Bakeries, lihambele ehholo KwaNdengezi livakashele inhlangano yabantu asebesempeshenini iKwaNdengezi Senior Citizens liphethe izinkwa, amalayisi nezingubo zokulala zakwa-Aranda Blankets.
Ngaphambi kokuya KwaNdengezi, ithimba leSolezwe nabaxhasi balo bavakashele ekhaya labadala nabaphila nokukhubazeka iSakhisizwe Old Age Home, eNewtown A, eNanda, nezipho.
Nezinye izinkampani nohulumeni benze okufanayo.
ABANTU abadala baKwaNdengezi abangamalungu eKwaNdengezi Senior Citizens Isithombe: FANELESIBONGE BENGU
UMNUZ Zwelakhe weSolezwe noMnuz Samukelo Nkosi benikezela ngezingubo zokulala. Siyabonga kubaxhasi I-Aranda Blankets nabakwa-Premier Foods.
Isiteshi iGagasi FM sibambisene nabakwaBidvest Waltons neSunshine Bakery sivakashele eDawede Primary School, eMolweni, eThekwini lapho benikele khona ngezitofu zegesi, i-printer, inventer, izinkwa nokunye Isithombe: SITHUNYELWE
UNGQONGQOSHE wemiSebenzi kaHulumeni KwaZulu-Natal, uMnuz Martin Meyer ubeke eceleni amasudi wasiza umphakathi ukususa isikhotha eReservoir Hills Isithombe: SITHUNYELWE
ILUNGU lesigungu esiphezulu se-ANC KwaZulu-Natal uNkk Mbali Frazer nabanye abaholi bale nhlangano esifundazweni bahambele isikole iZuzumqhele Secondary KwaMakhutha beyovuselela upende basilungisa Isithombe: ANC KZN
IZIKHULU nabasebenzi baseMngeni-uThukela Water zigubhe usuku ngokupenda nokuhlanza izikole iQinisani neNdukwentsha eSidumbili naseNdwedwe Isithombe: uMNGENI-UTHUKELA WATER
ABE-SOUTH African National Parks, Honorary Rangers South Region nabeNdlovukazi Foundation bagubhe usuku lukaMandela ngokunikela ngamaqakelo ePhefeni Secondary School kuVikalazi Street, eSoweto Isithombe: SITHUNYELWE
IMEYA kaMasipala uMdoni uNkk Mbali Cele-Luthuli (kwesokudla) itshale engadini eBringing Hope Educate, oGqolweni ihambisana naboMnyango wezoLimo nabesifunda Ugu Isithombe: UMDONI MUNICIPALITY
ABAFUNDI basoHlange High School eNanda bajatshuliswe wukufika kwabaholi bakaMasipala weTheku behamba nethimba leResergunce lase-United States of America bezogubha nabo usuku lokuzalwa kukaMadiba Isithombe: SITHUNYELWE
Ithimba le Gagasi FM ngesikhathi liyonikela. Kusuka ngemuva kwesokunxele nguLusanda Mnqayi, Zisto, Minenhle Dlamini noSibongile Zwane. Abaphambili ngoDJ Sphectacula, Nelisiwe Sibiya, Nhlakanipho Mkhwanazi, Gugu Mabaso noMenzi Manzini. Isithombe: Sithunyelwe