UCHAZWE njengomuntu obekhathalele abantu futhi enothando lomndeni wakhe, uJabulani ' Mjay' Zama enkonzweni yakhe yomngcwabo ebiseDurban Station Space Events, eThekwini ngoMgqibelo.
Izikhulumi ezehlukene zituse lo somabhizinizi ongumnikazi wendawo yobumnandi i- Eyadini, eseMlaza.
Umngani kaMjay weminyaka uMnuz Lizwi Maphumulo uthe umndeni, abangani nabantu ikakhulu eMlaza nakuzona zonke izindawo, balahlekelwe kakhulu ngokudlula kwakhe emhlabeni.
"Bekuyindoda eneqiniso esizanayo nengawufuni umsindo. Ngimazeze eseyiphoyisa eNtuzuma, waqala ibhizinisi lama- breakdown, wabuya wangena kwelamatekisi kodwa washeshe waphuma kulo ngoba bekuwumuntu ongazwani nomsindo. Ungene kwezokwakha ngaphambi kokuba eqale indawo yobumnandi Eyadini edume kakhulu," kusho uMaphumulo
Umngcwabo uhanjelwe izikhulu zikahulumeni kuzwelonke nesifundazwe okukhona kuzo uNdunankulu uNkk Nomusa Dube-Ncube, uNgqongqoshe eMnyangweni wezokuThuthukiswa koMnotho ukuVakasha nezeMvelo uMnuz Siboniso Duma, nowezeMidlalo ubuCiko ngamaSiko kuzwelonke uZizi Kodwa.