Kulindelwe izivakashi eziqhamuka emazweni ehlukene ezingu-1.3 million eThekwini njengoba kuzongena ihlobo.
Lokhu kuhlaluke ngesikhathi kwethulwa umkhankaso iDurban Tourism Summer, eCoastal Lounge Resort, eMgababa izolo ngaphansi kwesiqubulo esithi: The Endless Wave of Tranquility obuhanjelwe abaqhamuka emkhakheni wezokungcebeleka njengoba bekukhona oDJ abadumile okubalwa kubo oDJ Sox, T’zozo uDJ Bongs nabanye.
IMeya yaseThekwini, uMnuz Cyril Xaba, yethule ngokusemthethweni lo mkhankaso yathi inhloso yawo ukugcina iTheku lisemiqondweni yezivakashi.
"Ngalo mkhankaso sifuna ukuqhakambisa izindawo zaseThekwini ezingamagugu anomlando ocebile. Sifuna izivakashi uma zifika edolobheni lethu ziziwe ziyingxenye yethu," kusho uXaba.
Uthe njengoba kukhona ezinye izindawo zokubhukuda ezisavaliwe, bazozivula maduze.
"Izindawo zokubhukuda ebezisavaliwe bekungamele kubhukudwe kuzo, futhi sasitsheliwe ukuthi asime kancane ukuzivula siqikelele ukuthi uma sesizivula asibi nayo inkinga. Asifuni nokuncane okuzokhalisa izivakashi zethu zidikibale yingakho sisavule izindawo zokubhukuda ezingu-5 kuphela," usho kanje.
UXaba uphinde waqinisekisa ukuthi ezokuphepha ziqinisiwe ukuqinisekisa ukuthi izivakashi ziphephile.
"Ezokuphepha zibalulekile ngoba uma singaziqinisi, okubi okuzokwehlela isivakashi esisodwa kuzobalekisa zonke izivakashi kuphinde kulahlekise ithemba kulabo abebefuna ukuzovakasha kuleli dolobha," ubeke kanje.
Khonamanjalo ikhansela laku ward-98 eMgababa, uMnuz Arthur Mgobhozi, lithe bazizwe behloniphekile ngokuthi lo mkhankaso uzokwethulwa eMgababa.
"UMgababa unomlando omuhle kakhulu futhi ngimema wonke umuntu, nabaqhamuka kwamanye amazwe ukuthi beze bazojabula ngoba iTheku livulelekile," kusho uMgobhozi.