KUNENGEKE abasolwa eNkantolo eNkulu yaseBloemfontein kuhlehla icala ngenxa yokungapheleli kwabasolwa nabanye abangenabo abameli.
Kule nkantolo bekuvele owayengunobhala jikelele we-ANC uMnuz Ace Magashule nabanye asolwa nabo ngamacala enkohlakalo athinta ithenda ye-asbestos.
Kufikwa enkantolo, kubikelwe ijaji ngezingqinamba ezikhona eziphoqa ukuba icala lingaqhubeki. Okhulumela uphiko lwezokushushisa eFree State uMojalefa Senokoatsane utshele abezindaba ukuthi isizathu esikhulu esenze icala lahlehla wukuboshwa kukaMoroadi Cholota owayengumsizi kaMagashule. UMoroadi, okumanje use-United States of America, uboshwe yiziphathimandla e-USA futhi kulindeleke ukuba avele enkantolo ngoMsombuluko 15 Ephreli 2024.
UMbuso uveze ukuthi uzophuthuma izinhlelo zokubuyiswa kukaMoroadi kuleli kulandela ukuvela kwakhe enkantolo. Kubuye kwavela ukuthi ukuboshwa kukaMoroadi akusona sodwa isizathu sokuhlehla kwecala.
“Kuvele nokuthi ummangalelwa 5, okuyinkampani, ayinabo abameli kanti esinye isizathu wukuthi owayeyilungu lesigungu esiphezulu (MEC) uSarah Mlamleli, akakwazanga ukufika enkantolo ngenxa yokugula futhi kuvele ukuthi uzoze avele ngoJulayi 2024.”
Phambilini uMagashule, Edwin Sodi, Blackhead Consulting kanye noThabane Zulu, bafaka isicelo sokuhlakaza leli cala ngoba bethi alikho icala ababekwe lona, nokho inkantolo yasichitha isicelo sabo. Laba nabasolwa nabo okunguNthimotse Mokhesi, Mahlomola Matlakala, Sello Radebe, Kgotso Manyeki, Sarah Mlamleli, Nozipho Molikoe, Albertus Venter, Moroadi Cholota, Margaret-Ann Deidericks, nezinye izinkampani ezintathu, 602 Consulting Solutions, Mastertrade 232 kanye no-Ori babhekene namacala okukhwabanisa, inkohlakalo, ukushushumbiswa kwemali nokwephulwa koMthetho wokuPhathwa kweMali yoMphakathi (PFMA).
La macala amayelana nenkontileka ye-asbestos ka-R255 million eyakhishwa uMnyango wezokuHlaliswa kwaBantu eFree State yanikezwa inkampani iBlackhead Consulting, ukuze ihlaziye, ihlole futhi ikhiphe uphahla lwe-asbestos ezindlini ezisezindaweni zabahlwempu eFree State, cishe eminyakeni eyisithupha edlule.
Icala lizobuyela enkantolo ngomhla ka14 Juni lapho kuzokwethulwa izendlalelo zokuqulwa kwecala. Kulindeleke ukuthi kushone lelo langa sebelunikiwe usuku okuzoqulwa ngalo icala