Kudutshulwe kwafa umsolwa oyedwa omunye waboshwa ngesikhathi bezama ukubamba inkunzi egaraji lokwetha uphethroli iShell Service Station, kuMoss Street, eVerulam ngoLwesihlanu emini.
Inkampani yonogada iReaction Unit South Africa (Rusa) ithe amalungu ayo, amaphoyisa eSAPS abambisane ngemuva kokuthola ubunhloli bokuthi kunabasolwa abathathu abahlela ukubamba inkunzi egaraji.
Bathe bazungeze igaraji behamba ngezimoto ezingabhaliwe.
“Onogada bakwaRusa bangene esitolo kungapheli sikhathi esingakanani abasolwa bengenile. Abasolwa bavulele ngenhlamvu bezama ukubalekela ukuboshwa,” kusho isitatimende.
Onogada baphindisele ngenhlamvu kwadubuleka oyedwa wabo ekhanda. Kuthiwa ubalekele ngaserenki yamabhasi lapho eshayeke phansi khona. Utholakale nesibhamu esiyi-9mm.
“Umsolwa oneminyaka engu-19 ujahwe ngamalungu eRusa namaphoyisa eSAPS aseVerulam. Uboshwe esikhotheni eduze nomgwaqo uR102. Utholakale nesibhamu.”
Kushaye u-1 emini amaphoyisa esasendaweni yesigameko.