Amaphoyisa adubule abulala osolwa ngokubamba inkunzi abanye bagcwala amathafa eSikhaleni ngeSonto ebusuku.
Kuthiwa laba bebeqeda ukubamba inkunzi umgilwa eNdindima ngaphambi kokubaleka.
Okhulumela amaphoyisa KwaZulu-Natal, uColonel Robert Netshiunda, uthe amaphoyisa ampintshele ekhoneni abasolwa abane eNcombo.
“Bathe bangabona kuphayisa amalambu aluhlaza amaphoyisa, abasolwa badubula bebhekise ngakuwona nokuholele ekutheni amadoda omthetho aziphendulele. Kufe umsolwa oyedwa kulokho kudubulana abanye abathathu babaleka bangena esikhotheni,” kusho uNetshiunda.
Uthe umufi utholwe nesibhamu i-.38 special revolver nezinhlamvu ezinhlanu futhi akukho phoyisa elilimalile.
Uthe amaphoyisa amatasa athungatha ababalekile futhi banxusa noma ubani onolwazi ngabasolwa ashayele isiteshi esiseduze noma ku-08600 10111.