KUSALINDELEKE ukuthi senyuke isibalo sababoshwayo ngezigameko zokubulawa kwamaphoyisa aphucwa izibhamu eMtubatuba naseRichards Bay ngenyanga edlule.
Lokhu kuvezwe amaphoyisa emuva kokuthi uphiko loKlebe lubophe umsolwa oneminyaka engu-32 okusolakala ukuthi uyathinteka ekubulaweni kwamaphoyisa amathathu okukhona kuwona amabili omgwaqo, oboshwe eseMtubatuba, ngoLwesihlanu.
Okhulumela oKlebe eKZN uCaptain Simphiwe Mhlongo, uthe umsolwa uvele eNkantolo yeMantshi yaseMtubatuba ngecala lokutholakala nesibhamu esingekho emthethweni nezinhlamvu izolo kanti namuhla uzovela eNkantolo yeMantshi yaseSikhaleni ngamacala asoleka kuwo okubulawa kwamaphoyisa.
U-Inspector Sizwe Sithole (49) no Inspector Mxolisi Lamula (35) abebesebenza ngaphansi kwe-Road Traffic Inspectorate, kuthiwa babenza umsebenzi wabo emgwaqweni u-N2 eMtubatuba ngaseNkodibe ngesikhathi behlaselwa abasolwa abangaziwa okukholakala ukuthi babadubula base bethatha izibhamu zabo zomsebenzi.
Esikhathini esiyizinsuku ezintathu ngaphambi kokubulawa kukaLamula noSithole, kwakubulawe uSergeant Nkosinathi Ngcobo (41) obesebenzela esiteshini samaphoyisa esiseRichards Bay, okuthiwa wahlaselwa wadutshulwa washonela endaweni yesigameko esendleleni eyolanda umngani wakhe ePort Dunford. Nakuye kwathathwa isibhamu somsebenzi.
Khonamanjalo ngalo uLwesihlanu kuphinde kwaboshwa abasolwa ababili abaneminyaka ephakathi kuka- 28 no 29 kwaMsane abebevele eNkantolo yeMantshi yakwaMsane ngamacala okutholakala nesibhamu esingekho emthethweni nezinhlamvu
UMhlongo uthe amaphoyisa ophiko olulwa nobugebengu obuhleliwe agasela lapho kuhlala khona abasolwa emva kokuthi elunywe indlebe.
Ungqongqoshe wezokuThutha, ukuPhepha nokuXhumanisa uMphakathi eKZN uNkk Peggy Nkonyeni ukwamukele ukuboshwa kosolwa ngokubulawa kwamaphoyisa.