BANIKEZWE ibheyili kaR20 000 umuntu ngamunye yiNkantolo yeMantshi yaseMgungundlovu ngoLwesibili, abasolwa ababili kwelokukhwabaniswa kwemali eyevile kuR17 million, esikhwameni sezimali zamafa emahhovisi oMnyango wezobuLungiswa nokuThuthukiswa koMthetho-sisekelo.
Inkantolo inqume ukulihlehlisela ku-Ephreli 25 nonyaka, icala elibhekene nabasolwa abaneminyaka ephakathi kuka-31 no 42. Bathweswe amacala enkohlakalo, ukweba nokushintshisana ngemali ngendlela engekho emthethweni.
Kusolwa ukuthi ngo-Ephreli nyakenye, imali ewuR17 782 132. 59 yafakwa kuma- akhawunti amabhizinisi iRidgeville Investments 2000, ne-LMJ General Trading Pty Ltd. Kuthiwa yakhishwa esikhwameni samafa okubalwa kuwo awezingane ezincane nezintandane, esenganyelwa yi-Master of the High Court. Kuthiwa esikhathini esiningi imali isuke ishiwe yizihlobo esezashonangakho ifakwa esikhwameni ngenhloso yokuyilondolozela abangakwazi ukuzigcinela yona.
Okhulumela uphiko lwamaHawk KwaZulu-Natal, uLieutenant Colonel Simphiwe Mhlongo, uthe kuvulwe icala lokukhwabanisa esiteshini samaphoyisa eMgungundlovu, idokodo ladluliselwa kulolu phiko.
“Amaphoyisa alolu phiko ngokubambisana nabophiko lokuQoqwa kweMpahla nabe-Financial Intelligence Centre, bakwazile ukubuyisa uR8 million wemali entshontshiwe. Kulindeleke ukuthi sande isibalo sababoshwayo,” kuchaza uMhlongo.
Inhloko yophiko iDirectorate Priority for Priority Crime investigation KwaZulu-Natal, uMajor General Leseja Senona, ukwamukele ukuboshwa kwabasolwa, washayela amaphoyisa ihlombe ngomsebenzi wawo.
Okhulumela uPhiko lwezokuShushiswa koMphakathi KwaZulu-Natal, uNkk Natasha Kara, uncome amaphoyisa nophiko oluqoqa impahla olungaphansi kwabo ngomsebenzi omuhle.