KULINDELEKE ukuthi iphume nobuholi obusha i-ANC Women’s League ehlalise ingqungquthela yayo evulwe ngoLwesihlanu nezosongwa ngeSonto.
Ingqungquthela eseNasrec Expo Centre, eGauteng, bekufanele iqale ngesonto eledlule kodwa yahlehliswa ngenxa yokuthi amalungiselelo abesele emuva.
Ukubhalisa kuqale kahle ngoLwesihlanu, izithunywa ezivela ezifundazweni ezehlukene bezifike ngobuningi bazo zicula amaculo omzabalazo, zimemeza namagama alabo ezibesekayo.
Umbango wesikhundla sikamengameli, uphakathi kukaNkk Bathabile Dlamini noNkk Sisisi Tolashe kanti noNkk Thembeka Mchunu uyaphatheka kulo mbango.
UNkk Dlamini kade vele engumengameli wophiko ngaphambi kokuthi ubuholi buhlakazwe sebuphelelwe yisikhathi. Esithangamini sabezindaba ngoLwesihlanu uphiko lwesikhashana lwe-ANCWL luthe konke kumi ngomumo, balindele ingqungquthela ezoba yimpumelelo.