KULINDELEKE ukuthi ivalwe nguMengameli uCyril Ramaphosa ingqungquthela yokukhetha ubuholi be-ANC Veterans League (ANCVL) ebanjelwe ehhotela iBirchwood, eBoksburg kusukela ngoLwesihlanu isongwe ngeSonto.
I-ANCVL okuyizingwevu ze-ANC, zihlangene zikhetha ubuholi kanti uMnuz Snuki Zikalala ubuyele kwesikamengameli wophiko. UZikalala etholene phezulu noMnuz Tony Yengeni obesifuna uthuli lesi sikhundla.
Uphiko lwezingwevu lwasungulelwa ukuthi lube wuhlaka olweluleka uKhongolose ngoba isikhathi esiningi ludidiyelwa ngabantu asebebadala enhlanganweni, abayazi ukusuka nokuhlala.
Uhlelo lwengqungquthela olukhishwe yi-ANC, lukhombe ukuthi ivulwe ngunobhalala-jikelele uMnuz Fikile Mbalula ngoLwesihlanu, iqhubeke njalo ize isongwe nguRamaphosa ngeSonto.
I-ANC isemkhankasweni wokuhlalisa izingqungquthela zezinhlaka zayo njengoba kuphunywa kweye-ANC Women’s Leauge kanti kade kusanda kuhlala eye-ANCYL.
Bonke abakhethwayo ezinhlakeni banxuswa ukuthi basize i-ANC inqobe ukhetho ngonyaka ozayo. Ukhetho lukazwelonke oluzobanjwa ngonyaka ozayo lubhekwe ngabomvu.
Khonamanjalo i-ANC Youth League KwaZulu- Natal imemezele ukuthi nayo izobamba eyayo ingqungquthela yokukhetha ubuholi bayo ebizoba sePort Sheptone kusukela ngoLwesine isongwe ngoMgqibelo.