LIYOZE liqulwe ngonyaka ozayo icala lenkohlakalo elibophe owayengungqongqoshe uMnuz Mosebenzi Zwane nabanye aboshwe nabo. UZwane nabanye baboshelwe icala lenkohlakalo kaR280 million. Bebevele eNkantolo eNkulu eBloemfontein, eFree State base betshelwa ukuthi icala labo lizoqala ukuqulwa ngo-Agasti 5 kuya kuSepthemba 13 2024.
UZwane kumanje uyilungu lePhalamende elimele i-ANC kanti wayewungqongqoshe wezoLimo eFree State ngesikhathi okusolwa ukuthi kwenzeka ngaso ubugebengu. Igama likaZwane liphatheka kakhulu odabeni lokugwamandwa kwamandla ombuso nokusondelana kwakhe nomndeni wakwaGupta.
UZwane nabanye babhekene namacala enkohlakalo, ukukhwabanisa nokushintshana ngemali ngendlela engekho emthethweni. Kulindeleke ukuthi uma sekuqala icala uMbuso ubize ofakazi bawo abazolandisa inkantolo ngokwenzeka ngesikhathi okukhulunywa ngaso.
