IKHOMBISE ukunengeka ingxenye yabamangalelwa abangu-65, ababoshelwe icala lokuphehla izibhelu zomtapo ngoJulayi 2021, kuchithwa izicelo zokuthi bathole abameli bamahhala.
Laba bamangalelwa abaqhamuka ezingxenyeni ezehlukene zezwe, bebevele eNkantolo eNkulu yaseThekwini ngoLwesine.
Bekulindeleke ukuthi kuqale kwenziwa izendlalelo zokuqala zokuqulwa kwecala kodwa kwahlehliselwa uJuni 26, nonyaka.
Enkantolo kuvele ukuthi isizathu esiholele bachithwe wukuthi imali banayo yokuthi bangazitholela abameli abakhokhelwayo.
Omunye wabachithiwe, uNksz Belecia Zwane (40) odabuka eGoli, phambilini owayekade enommeli okhokhelwayo.
Usukume watshela inkantolo ukuthi uzosiphonsela inselelo isinqumo sokuthi anganikwa ummeli wamahhala wakwa-Legal Aid.
“Sekuphele iminyaka emine ngehla ngenyuka ngikhokhela nendawo yokulala uma ngithamele leli cala eselidonse iminyaka emine. Ngamkhokhela ummeli kwaze kwaphela yona imali. Belilokhu lihlehliswa icala uMbuso ungakakulungeli ukuqala kwalo,” kubalisa uNksz Zwane.
Utshele inkantolo ukuthi uzowudalula umholo wakhe nezikweletu anazo uma esephonsela inselelo isinqumo sokuchithwa kwakhe.
IJaji Bruce Bedderson lithe liyazwelana naye kodwa ukuqulwa kwecala kumele kugcine kwenzekile.
Enkantolo bekukhona ijaji, abasebenzi basenkantolo, abameli nabamangalelwa abagcwala inkantolo nalapho kuhlala khona abasuke bethamele icala. Abanye abammangalelwa bebedlubhe umfaniswano weqembu uMkhonto weSizwe (MK) Party.
Ijaji lithe icala lingase liqulwe amasonto amahlanu kuya phezulu kodwa kuzoya ngokuthi kubizwa ofakazi abangaki.
Okhulumela uphiko lwezokushushisa, iNational Prosecuting Authority (NPA) KwaZulu-Natal, uNkk Natasha Ramkisson-Kara, utshele Isolezwe enkantolo ukuthi uMbuso bewumi ngomumo ukuze kuqhubeke icala.
“Kuphoqeleke ukuthi abameli ekade bekulungele ukuqala kwezendlalelo zecala balinde labo abebekade befuna ukumelwa abameli bamahhala,” kusho iNPA.
Abamangalelwa bathweswe icala lokubopha itulo lokususa udlambedlu emphakathini, ukugqugquzela udlame emphakathini, ubuphekula, ukuvukela uMbuso nokubopha itulo lokuzama ukubulala.
Izibhelu zaqala KwaZulu-Natal zenabela ezingxenyeni zaseGauteng. Zadlula nemiphefumulo yabantu abangu-350.