ITHEMBISA likhulu intokazi ebingenele imncintiswano iBig Brother Titans ephume emncintiswaneni ngeSonto eledlule.
UTebatso 'Blue Aiva" Mokoana (23) waseLimpopo ukhishwe nezinye izimbangi ezimbili emqhudelwaneni, okunguNana noMiracle OP baseNigeria.
Ekhuluma nentatheli yeSolezwe ngeSonto, uthe kuningi okusemqondweni wakhe azoba matasa ngakho, njengoba esephumile endlini yeBig Brother Titans.
Le ntokazi ibiyimbangi ebizifela ngokudansa, ubumnandi nokujabulisa izibukeli. UBlue Aiva, uthe kumthokozise kakhulu ukuba yingxenye yabebengele umncintiswano.
Uthe yize engaphumanga nemali abefisa ukuyithola kodwa ukholwa wukuthi ukwenzile abefisa ukukwenza ngesikhathi esengaphakathi endlini.
"Isifiso sami sifezekile. Ngikholwa wukuthi ngikwazile ukuthola ithuba lokuthi abantu bangazi kangcono, kanjalo nokusabalalisa ithalente lami lokudansa. Ngizimisele nangokuthi ngigxile nasekuklwebheni amapuleti, ukuzi ngikwazi ukukhipha izingoma zami," kusho le ntokazi.
Useke waba ngumdansi kumavidiyo ahlukene abaculi bakuleli, okubalwa kuwo ekaVetkuk and Mahoota, Blaq Diamond, DJ Noxious nabanye..