AMAPHOYISA kuMasipala weTheku akhiphe isixwayiso ngokuvalwa komgwaqo amasonto ambalwa kuleli dolobha.
Ngokwesitatimende esikhishwe amaphoyisa, kuzovalwa umgwaqo uBrooke Street oxhuma kuM4 ngaseningizimu uze uyongena kuDr Pixley KaSeme Street. Lo mgwaqo uzovalwa okwesikhashana kusukela ngoMeyi 3, (ngoLwesihlanu) kuze kube nguJuni 21, 2024.
Lo mgwaqo uzovalwa ukuze kuqhubeke kahle ukubhidlizwa kwebhilidi iChina Emporium.
Kunxuswa abashayeli ukuba bagweme ukuhambela kule ndawo, basebenzise le migwaqo:
*Ukungena kwesokunxele ku-Anton Lembede Street, ujikele kwesokudla kuWarwick Avenue ubuye kwesokudla ukuthola uPixley Ka Seme Street.*
*Ukungena kuMargaret Mncadi Avenue (Victoria Embankment)
*Ukungena kuChe Guevara Road (Moore Road)
Kukhuthazwa abashayei ukuba bacophelele futhi bahlele kahle izindlela zabo ukuze bangaphazamiseki.
Amaphoyisa omgwaqo azobe ekhona ukuqapha isimo.